काठमाडौं । दार्चुलाको लिपुलेक–कालापानी क्षेत्रलाई केन्द्रित गर्र्दै छाङरुमा बस्ने गरी सशस्त्र प्रहरी बलको टोली त्यसतर्फ प्रस्थान गर्दै छ । सेनाको हेलिप्कटरबाट बीओपी (बोर्डर आउट पोस्ट) सशस्त्र प्रहरी निरीक्षकको टोली दार्चुलाबाट छाङरु जान लागेको हो । छाङरु दार्चुलाको व्यास गाउँपालिका १ मा पर्छ ।

सरकारले यसअघि नै सो क्षेत्रमा सशस्त्र प्रहरी बलको बीओपी राख्ने निर्णय गरिसकेको थियो । त्यसका लागि जमिनसमेत प्राप्त भइसकेको छ । सशस्त्र प्रहरी बलका प्रवक्ता डीआईजी प्रवीण श्रेष्ठले सुर्खेतबाट सेनाको हेलिप्कटर उडिसकेको र सोही हेलिकप्टरले दार्चुलामा रहेको सशस्त्र प्रहरी बलको गुल्मको टोलीले छाङरु पुर्‍याउनेछ ।

तत्काल सशस्त्रको टोली भाडाको घर र टेन्टमा बस्नेछ । गृहमन्त्रीमा प्रेस सल्लाहकार किरण भट्टराईले पहिलो चरणमा दार्चुलाको खलंगाबाट २५ सशस्त्र प्रहरी र ९ नेपाल प्रहरीको टोली छाङरु जाने कार्यक्रम रहेको जनाए । 

नेपाल प्रहरी भने यसअघि पनि सो क्षेत्रमा बस्दै आएको थियो । छाङरुबाट लिपुलेक १५ देखि २० र कालापानी १२ किलोमिटरको दूरीमा पर्छ । बीओपीको मुख्य काम सीमा सुरक्षा, अपराध नियन्त्रण, राजस्व चुहावट रोक्ने भएको डीआईजी श्रेष्ठले बाह्रखरीलाई बताए ।