विराटनगर । कोरोना संक्रमणको जोखिम मध्यनजर गर्दै लगाइएको लकडाउन उल्लंघन गर्ने सवारीसाधन नियन्त्रणमा लिने क्रम बढेको छ ।
मोरङभर प्रहरीले लकडाउन उल्लंघन गर्न नदिन प्रयास गर्दै आएको छ । जिल्ला प्रहरी कार्यालय मोरङका अनुसार धेरैले लकडाउन बेवास्ता गर्दै सवारीसाधन चलाउने गरेका छन् ।
यो अवधिभर प्रहरीले एक हजार दुई सय ४७ सवारीसाधनलाई नियन्त्रणमा लिएको छ । प्रहरीका अनुसार यसमा मोटरसाइकल ७ सय ६३, स्कुटी ५२, कार, भ्यान २३, ट्र्याक्टर १४, ट्रक २५, साइकल ३ सय ३०, सिटीरिक्सा तथा ट्याम्पो ४० नियन्त्रणमा लिइएको हो ।
प्रहरीले यो अवधिमा ६ सर्वसाधारणलाई पनि नियन्त्रणमा लिएको छ । मोरङ प्रहरीका प्रवक्ता मानबहादुर राईले भने, “हामीले लकडाउन बाध्यतावश लगाइएको हो र रोगको संक्रमण फैलन नदिन सबैको उत्तिकै जिम्मेवारी छ भन्ने विषयमा पनि जनचेतना दिलाउने काम गरिरहेका छौं ।” राईले लकडाउन मान्नु नागरिकको कर्तव्य भएको सुनाए ।
हाल क्वारेन्टाइनमा महिला १०, पुरुष एक सय २६ गरी एक सय ३६ जना राखिएको प्रहरीको भनाइ छ ।
