काठमाडौं । दशगजामै अलपत्र परेका भारतबाट फर्किएका सबै नेपालीलाई प्रवेश अनुमति दिइएको छ । कोरोना नियन्त्रण उच्च स्तरीय समन्वय समितिले दशगजामै अलपत्र परेका नेपालीलाई आउन दिन निर्देशन जारी गरेको थियो ।
उक्त निर्देशन अनुरुप गड्डाचौकी नाकाबाट सोमबार बेलुका एकैटक ४०८ नेपाली महेन्द्रनगर प्रवेश गरे । नेपाल पत्रकार महासंघ कञ्चनपुरका पूर्वअध्यक्ष लक्ष्मण तिवारीका अनुसार साँझ ६ बजेसम्म ८९३ नेपाली नाकाबाट भित्रिएका हुन् ।
यसअघि नेपाल-भारत सीमाको दशगजा क्षेत्रमा अलपत्र परेका नेपालीलाई स्वदेश ल्याउने विषयमा गृह मन्त्रालयले कुनै प्रबन्ध नभएको जनाए पनि उपप्रधान तथा रक्षामन्त्री ईश्वर पोखरेल नेतृत्वको समितिले भने य उनीहरुलाई अलपत्र पार्न नहुने भन्दै उचित व्यवस्था मिलाएर प्रवेश गर्न दिइने निर्देशन जारी गरेको स्रोतले जनाएको छ ।
गृह मन्त्रालयका सूचना अधिकारी उमाकान्त अधिकारीले बाह्रखरीसँग कुरा गर्दै सीमा नाका बन्द हुँदाहुँदै आएकाहरुलाई नेपाल ल्याउने कुनै प्रबन्ध नभएको गैरजिम्मेवारपूर्ण जवाफ दिएका थिए । उनले बाह्रखरीसँग भनेका थिए, "सीमा नाका बन्द हुँदाहुँदै आएकाहरुलाई अलपत्र परेको भन्न मिल्दैन । सीमा नाका बन्द भइसकेको छ । उनीहरुलाई नेपाल ल्याउने विषयमा कुनै प्रबन्ध मिलाइएको छैन ।"
तर, सोमबारै बसेको समिति बैठकको यस्तो निर्णयबाट दशगजामा अलपत्र परेका नेपाली घर फर्किएका छन् ।
भारतका विभिन्न ठाउँबाट नोभेल कोरोना भाइरसको त्रास र नेपालीहरुको नयाँ वर्ष मनाउन स्वदेश फर्किएका ३०१ नेपाली कञ्चनपुरको गड्डाचौकीभन्दा पारिको १० गजा क्षेत्रमा अलपत्र परेका थिए । जसमध्ये दुई गर्भवतीसहित ४९ महिला र बालबालिका थिए ।
भारतको उत्तराखण्ड राज्यमा जनता कर्फ्यु मार्च ३१ सम्म जारी भए पनि बाटोमा उनीहरु अलपत्र पर्नसक्ने भन्दै वनबासाबाट नेपालतर्फ पठाइए पनि नेपालमा भने आफ्नै जनतलाई आउन रोक लगाइएको थियो ।
नेपाल सरकारको मन्त्रिपरिषद्को आइतबार राति बसेको बैठकले भारत-चीनसँगका नाकाहरु बन्द गर्ने निर्णय गरेको थियो । सोही निर्णयबमोजिम आजैदेखि सीमा नाकाहरु सिल गरिएका छन् भने कञ्चनपुर 'लकडाउन'को स्थितिमा छ ।
तर समितिको यस्तो निर्णयपछि दशगजा क्षेत्रमा अलपत्र नेपाली खुसी भएका छन् ।
सीमानाका बन्द हुँदाहुँदै आएकालाई नेपाल ल्याउने प्रबन्ध केही छैन : गृह मन्त्रालय
सीमा नाका बन्द हुँदा दशगजामा अलपत्र नेपाली
तस्बिर सौजन्य : लक्ष्मण तिवारी
1613387568.jpg)
