काठमाडौं । काठमाडौं महानगरपालिकाका मेयर विद्यासुन्दर शाक्यले सम्पदा पुनर्निमार्णका लागि बजेट अभाव नरहेको बताएका छन् । स्थानीयसँग मेयर शाक्यले महानगर क्षेत्रका सम्पदा पुनर्निमार्णका जस्तोसुकै योजना लिएर आए पनि बजेट अभाव नरहेको बताएका हुन् ।

राजकीर्ति महाविहार (टेवाहाल) भित्र रहेको अक्षेभ्य तथा गतको मन्दिर पुनर्निर्माण सम्पन्न भएको अवसरमा मंलबार आयोजित कार्यक्रममा बोल्दे मेयर शाक्यले यस्तो बताएका हुन् ।
“सम्पदा निर्माण गर्दा जनसमुदायको पनि अपनत्व हुने गरी काम गर्नुपर्छ । तपाईंहरु सम्पदा निर्माणको योजना लिएर आउनुहोस् बजेट अभाव हुन दिन्न,” मेयर शाक्यले भने ।

महानगरको सहरी योजना आयोगले डिजाइन तयार पारेको उक्त मन्दिर काठमाडौं महानगरपालिकाको २२ लाख २४ हजार नौ सय ४६, सांसद विकास कोषको आठ लाख ११ हजार नौ सय ४० र उपभोक्ता समितिको ३६ लाख ६७ हजार ४ सय २ रुपैयाँ सहयोगमा निर्माण भएको हो ।

मेयर शाक्यले सम्बोधनकै क्रममा सम्पदा निर्माण एकजनाको मात्र पहलमा सम्भव नहुने भन्दै सबैको सहयोग आवश्यक रहने भन्दै महानगरपालिकाभित्रका सम्पदा निर्माणमा सबैको हातेमालो आवश्यक रहने पनि बताए । 

“सांसद विकास कोष, प्रदेश सरकार, महानगर र वडाबाट आउने बजेट एकीकृत गरेर काम अघि बढाउने हो भने धेरै काम गर्न सकिन्छ,” मेयर शाक्यले भने, “अन्य ठाउँमा सम्पदा पुर्ननिर्माणमा पनि तपाईंहरु जुट्नुहोस् । म सहयोग गर्न तयार छु ।”

मेयर विद्यासुन्दर शाक्यले ‘भिजिट नेपाल २०२०’ लाई मध्यनजर गर्दै महानगरपालिकाले सम्पदा पुर्ननिर्माणको कामलाई तीव्रता दिएको बताएका छन् । “यतिबेला काठमाडौँ महानगरपालिका भ्रमणवर्ष २०२० तर्फ केन्द्रित भएको छ,” मेयर शाक्यले भने, “हामी अहिले यसैमा केन्द्रित रहेर महानगरपालिकाभित्रका सम्पदा पुर्ननिर्माण गर्ने, हरियाली प्रवद्र्धन गर्नेजस्ता कार्यमा लागेका छौं । यो मन्दिर निर्माण पनि त्यसैको एउटा उदाहरण हो ।”

मेयर शाक्यले भिजिट नेपाल २०२० मा आन्तरिक र बाह्य दुर्व पर्यटकलाई आकर्षित गर्न महानगरपालिकाले अन्यवर्षभन्दा बढी मेहनत गर्नुपर्ने भन्दै सबै जनप्रतिनिधिलाई पनि एकाकार भएर अघि बढ्न आग्रह गरे । 

“न्युरोड काठमाडौँको पनि केन्द्रभागमा अवस्थित छ,” मेयर शाक्यले भने, “विश्वसम्पदा सूचिमा सूचिकृत क्षेत्रको आसपासमा रहेको न्युरोडलाई हामी नमूना बनाउन चाहन्छौं । हामी यसैअनुसार नै काम गरिरहेका छौं ।”

मेयर शाक्यले अब टे बहालकै आगम घर र सङ्कटा मन्दिर पुर्ननिर्माण चाँडै सम्पन्न गर्ने पनि बताए । काठमाडौं क्षेत्र नम्बर ९ का सांसद कृष्णगोपाल श्रेष्ठ, प्रेदश सांसद डाक्टर अजयक्रान्ति शाक्य, क्षेत्र नम्बर ८ का प्रदेश सांसद राजेश काजी श्रेष्ठलगायतको उपस्थिति रहेको सो कार्यक्रममा काठमाडौं महानगरपालिका सहरी योजना आयोगका उपाध्यक्ष सरोज बस्नेत, श्री संकटा संरक्षण तथा व्यवस्थापन समितिका अध्यक्ष चक्रेश्वर मोतिकाजी बज्राचार्यलगायतले सम्बोधन गरेका थिए ।
 

प्रतिकृया दिनुहोस