एजेन्सी । वायु प्रदुषणयुक्त वातावरणमा रहने गर्ने गर्भवती महिलाहरुले जन्म दिने शिशुको टाउको सानो हुने खतरा रहेको एक नयाँ अनुसन्धानमा पत्ता लागेको छ । विशेषगरी सवारी साधनले उत्पादन गर्ने नाइट्रोजन डाइ–अक्साइडले गर्भावस्थाको अन्तिम हप्तातिर बच्चाको शारीरिक विकासमा नकारात्मक असर गर्ने गरेको बताइएको हो । 

वैज्ञानिकहरुका अनुसार एक दशक अगाडिदेखि यस विषयमा गरिएका अध्ययनहरुमा गर्भमा पर्ने प्रदुषणका खतरनाक असरबारे स्पष्ट प्रमाण फेला परिसकेकाले पनि यसलाई चिन्ताजनक मानिएको छ । यसका साथै अस्वस्थ आहार, मदिरा र वातावरणीय रसायनहरुले पनि जोखिम बढाउने गरेको डेलीमेलले जनाएको छ । 

युनिभर्सिटी अफ अबर्डीनका मुख्य अध्ययनकर्ता प्रोफेसर स्टिभ टर्नर भन्छन्, “हामीले यस्ता पक्षहरुले जन्मनु अघि बच्चाको शरीरिक विकासमा कसरी प्रभाव पार्न सक्छ भन्नेमा अध्ययन गरेका हौँ । यसका लागि हामीले पहिलोपटक भ्रूणसँग सम्बन्धित १३ वर्ष पुराना चिकित्सा अध्ययनहरुको पनि उपयोग गरेका छौँ ।”

युरोप, अष्ट्रेलिया र अमेरिकामा मात्र यस किसिमका सात अध्ययनहरु गरिएको पाइएको छ ।  यसरी नाइट्रोजन डाइअक्साइड सवारी साधनबाट मात्र नभएर चुरोटको धुँवा, मट्टीतेल, ग्यास आदिका हिटर र स्टोभबाट पनि उत्पन्न हुने हुँदा वैज्ञानिकहरुले सचेत रहन चेतावनी दिएका हुन् । 

कम तौल भएका शिशुहमा मुटु सम्बन्धी रोग, मधुमेह र दमको खतरा हुने सम्भावना बढी रहेको प्रोफेसर टर्नरको भनाइ छ ।  यसैकारण पनि बेलायत सरकारले सन् २०३० सम्ममा सबैभन्दा हानिकारक मानिएका पाँच नाइट्रोजन डाइअक्साइड उत्पादकको प्रयोग बन्द गर्ने लक्ष्य सुरु गरेको छ ।