काठमाडौं । इलामको देउमाइस्थित मंगलबारेमा चैत २३ र २४ गते साहित्य तथा पर्यटन महोत्सव हुने भएको छ ।
‘समाजका लागि युवा’ नामक संस्थाले पहिलो पटक गर्न लागेको महोत्सवमा साहित्य, कला, पर्यटन, संस्कृति, राजनीति, आदि विषयमा विमर्श हुनेछ । कार्यक्रमको पहिलो दिन लेखक अभी सुवेदी, कुन्ता शर्मा र सीमा आभासको ‘सार्वजनिक जीवनमा महिला सकस कति सुविधा’ विषयमा बहस गर्नेछन् ।
‘थातथलो र परदेश’ विषयमा पत्रकार टीकाराम यात्रीले लेखक खगेन्द्र संग्रौलासँग बहस गर्नेछन् । यस्तै देउमाई नगरपालिका, फाकफोकथुम गाउँपालिका र माङसेबुङ गाउँपालिकाका प्रमुखसँग ‘देउमाई –२०९०’ विषयमा छलफल हुनेछ ।
दोस्रो दिन ‘युवा अवसर र नेतृत्व’ विषयमा नेकपा सांसद योगेश भट्टराई र नेपाली कांग्रेसका युवा नेता प्रदीप पौड्यालसँग पत्रकार बसन्त बस्नेतले छलफल गर्ने आयोजकले जानकारी दिएको छ ।
सोहीदिन ‘कविता कला कि नारा ? कवितामा स्थानीय भाषाको प्रभाव’ विषयमा कवि राज माङलाक, मुनाराज शर्मा र नेपाल प्रज्ञा प्रतिष्ठानका प्रतिनिधिसँग पत्रकार समीरबाबु कट्टेलले बहस गर्नेछन् ।
कार्यक्रममा राजनीतिक विश्लेषक प्रदीप गिरिले ‘००७ साल पछिको नेपाल’माथि बोल्नेछन् । यस्तै पत्रकार नारायण वाग्ले, अभिनेता दयाहाङ राई र वरिष्ठ मूर्तिकार राजु पिठाकोटेले आ–आफ्नो क्षेत्रका संघर्षका कथा सुनाउने कार्यक्रम रहेको छ ।
छिमेकी जिल्लासहित सिलिगुडीका कविहरूले कविता सुनाउने महोत्सवमा देउमाई किन घुम्ने भन्नेबारेमा प्रदेश सभासद् राम राना र नेपाल पत्रकार महासंघका पूर्वअध्यक्ष विष्णु निष्ठुरीले बोल्नेछन् ।
महोत्सवमा नेपाल पर्यटन बोर्ड पबद्र्धन तथा नेपाल प्रज्ञा प्रतिष्ठान र देउमाई नगरपालिका सहयोगी संस्थाको रुपमा रहनेछन् ।