काठमाडौं । कञ्चनपुरको पुनर्वासबाट बरामद भएको १८ किलो सुन प्रकरणमा संलग्नताको आशंकामा सादा पोशाकका प्रहरी र उनका भाइ पक्राउ परेका छन् । प्रहरी स्रोतका अनुसार पक्राउ पर्नेमा सादा पोशाकमा कैलालीमा कार्यरत प्रहरी जवान सुरज तिरूवा र उनका भाइ लक्ष्मण तिरूवा रहेका छन् ।
निर्मला हत्याको अनुसन्धानका लागि कञ्चनपुरमै रहेको सीआईबी, अपराध महाशाखा, कैलाली र कञ्चनपुर प्रहरीको टोलीले सुन बरामद गरेको हो । उपत्यका बाहिर पक्राउ परेको यो ठूलो परिमाणको सुन रुपन्देहीको सुनौली नाकामार्फत कैलाली हुँदै कञ्चनपुर पुगेको थियो । स्रोतका अनुसार यो अवैध सुन हो ।
सुनका मालिक भारतीय नागरिक भएको र उनी दिल्लीमा बस्दै आएको बताइएको छ । प्रहरीका एक अधिकारीले भने, ‘‘दुई महिनाअघि नै सुन कैलाली पुगेको रहेछ । लक्ष्मणले भारतबाट भारतीय नागरिकको गाडीसहित सुन ल्याएका रहेछन् । भारतीय नागरिकले कैलालीबाट गाडी लिएर गए । तर तस्करीको सुन भएकाले कहिँ कतै प्रहरीमा उजुरी गरेनन् ।’’ सुन कैलाली पुर्याएपछि लक्ष्मण फरार भएका थिए ।
लक्ष्मणका दाइ सुरज नेपाल प्रहरीमा कार्यरत भएकाले उनले आफ्नो ससुरालीमा सुन खाल्टोमुनी लुकाएर राखेका थिए । भारतीय व्यापारीले नेपालबाट त्यो सुन भारत लगेको हुन सक्ने आशंका छ । लक्ष्मण भारतीय व्यापारीको चालकको रुपमा काम गर्दै आएको बताइएको छ । सुन बेच्ने र सुनबारे जानकारी भएकालाई मिलाउने विषयमा विवाद हुँदा सुनको सूचना चुहिएको प्रहरी स्रोतले बतायो ।
सुन १८ किलोग्राम मात्रै हो वा अरु पनि थियो भन्नेबारे अनुसन्धान भइरहेको सीआईबी स्रोतले जनाएको छ । ‘‘प्रहरीले हात पारेको यो ठूलो सफलता हो । काठमाडौं बाहिर यति ठूलो परिमाणमा सुन कमै समातिएको छ,’’ एक अधिकारीले भने ।
आईजीपी सर्वेन्द्र खनालको सचिवालयका एसएसपी रामदत्त जोशीले सुन बरामद भएको तर थप अनुसन्धान जारी रहेको बताए । ‘‘यो ठूलो उपलब्धी हो । गहन तरिकाले अनुसन्धान गरिरहेका छौं,’’ जोशीले भने ।
सुन तस्करहरुले भारतबाहेक तेस्रो मुलुकबाट सुन नेपालको बाटो हुँदै भारत लैजाने गरेको विभिन्न अनुसन्धानले देखाएको छ । त्यो सुनपनि नेपाल हुँदै भारत गएको र भारतबाट लक्ष्मणले नेपाल ल्याएको हुन सक्ने अनुसन्धानले देखाएको एक अधिकारीले बताए ।
‘‘भारतबाट नेपालमा सुन आउँदैन । यो नेपालबाटै तस्करी भएको सुन हुन सक्छ,’’ एक अधिकारीले भने । साढे ३३ किलो सुन प्रकरण चर्चामै रहेको बेला प्रहरीले कञ्चनपुरबाट १८ किलोग्राम सुन बरामद गरेको हो । नेपाली बजारमा १८ किलो सुनको मुल्य ९ करोड हुन आउँछ ।
