गत साता (बिहीवार) कीर्तिपुरमा भएको रोमाञ्चक खेलको लेखाजोखा भइरहेको छ । यसमा बुझेर हो वा नबुझेर धेरैले आगामी दिनमा भारतमा हुने क्रिकेट विश्वकपको म्याच खेल्न नै नेपाल छानिएकोजस्तो गरेर पुरस्कार घोषणा गर्नेलगायत गरिरहेका छन् । अझ कतिपयले त भारतसँग भिड्ने भइयो र भारतीय खेलाडीको  सातोपुत्लो उँडिसक्यो भन्ने खालका हावादारी गफसमेत पोस्ट गरेको देखिन्छ ।

अब अलिकति तथ्य पनि बुझौँ न ।

नेपाल अहिले सम्पन्न भएको सुपर लिग-२ मा तेस्रो स्थानमा अटायर अन्तिममा हुने विश्वकपका लागि छानिनुपर्ने १० टिममध्ये छानिन बाँकी २ सिटका लागि अर्को बाधा (next and final hurdle) विश्व कप क्वालिफायर लिग म्याच (World Cup Qualifier League Match) खेल्ने १० टिममध्ये एउटा टिम हुन पुगेको हो । विश्वकप नै खेल्न जान छानिएको होइन । यो अझै बेला भइसकेको छैन । अन्तिम अन्तिमतिरको छनोट प्रक्रियामा नै छ ।

सुपर लिगको  अङ्क तालिका हेर्दा आयोजक देशको हैसियतले भारतसमेत गरेर जम्मा ७ देश विश्वकप खेल्न छानिइसकेका छन् भने थप ३ टिम छानिन बाँकी छ । छनोटमा परिसकेका ७ देश र तिनले प्राप्त गरेको अङ्कअनुसार १ देखि ७ सम्मको वरीयता यस्तो छ -  १. इङ्गल्यान्ड (१५५ अङ्क), २. न्युजिल्यान्ड (१५० अङ्क), ३. इन्डिया (१३९ अङ्क), ४. बङ्गलादेश (१३० अङ्क), ५. पाकिस्तान (१३० अङ्क), (६) अस्ट्रेलिया (१२० अङ्क) र (७) अफगानिस्तान (११५ अङ्क) । यसमध्ये सुपरलिग १ को अङ्क तालिकामा पुछारतिर रहेका १. वेस्ट इन्डिज , २. दक्षिण अफ्रिका, ३. श्रीलङ्का, ४. आयरल्यान्डमध्येको कुनै १ टिम पनि अब बाँकी खेलहरूको नतिजाअनुसार आठौं टिमको रूपमा स्वतः अटाउनेछ ।

अहिलेसम्म वेस्ट इन्डिजले पूरै चक्र पूरा (cycle complete) गरेर ८८ अङ्क बटुली आठौं स्थान सुनिश्चित गरिरहेको छ भने अन्तिम राउन्ड खेल्न बाँकी रहेका दक्षिण अफ्रिका (७८ प्वाइन्ट नेदरल्यान्डससँग २ म्याचको सिरिज खेल्न बाँकी), श्रीलङ्का (७७ प्वाइन्ट- न्युजिल्यान्डमा ३ म्याचको सिरिज खेल्दै), र आयरल्यान्ड (६८प्वाइन्ट- बंगलादेशसँग आफ्नै देशमा ३ म्याचको सिरिज यही मे महिनामा खेल्ने) ले पनि सुपरलिग-१ को आठौं स्थानमा पर्ने सम्भावना कायमै राखेका छन् । यी तीन टिमले खेल्न बाँकी म्याचहरूमा सबै जिते वेस्ट इन्डिजको ८८ अङ्कभन्दा बढी बनाउनेछन् । जित्न नसकेमा वेस्ट इन्डिज नै आठौं टिमका रूपमा छनोट हुनेछ ।  

यस प्रकार सुपर लिग-१ टुंगिनै लागेको  छ । यो  टुंगिएपछि सुपरलिग-१ को पुछारमा रहने बाँकी सबै टिमले पनि विश्वकपको लागि छनोट हुन बाँकी थप २ सिटका लागि अब जिम्बाव्बेमा १८ जुनदेखि सुरु हुने क्वालिफायर लिग (Qualifier League Match) थप खेल्नु पर्नेछ । यसका लागि सुपर लिग -१ का पुछारका ५ टिम, सुपरलिग-२ का टप ३ टिम (नेपाल यसैमा अटाएको हो) र क्वालिफायर प्ले अफ म्याचका टप दुई टिमसमेत गरी विभिन्न चरण र प्रक्रियाबाट छानिदै आएका १० टिमबीचमा क्वालिफायर म्याचहरु थप खेल्नु पर्नेछ । यही जुन १८ देखि एक महिनाका लागि जिम्बाव्बेमा हुने क्वालिफाएर लिग म्याचबाट प्रथम र दोस्रो हुने दुई टिम थप छनोट हुनेछन् । क्वालिफायरबाट छनोट हुने यिनै दुई टिम छानिएर पहिले नै छनोट भइसकेका ८ टिमसँग थपिन गई उच्चस्तरको एक दिवसीय विश्व क्रिकेट प्रतियोगिता खेल्न उत्कृष्ट १० टिमबीचमा प्रतिस्पर्धा हुनेछ । यही नै विश्वकप क्रिकेट प्रतियोगिता २०२३ (भारतमा अक्टोबर नोभेम्बरतिर हुन लागेको ) को फर्म्याट हो ।

यस्का लागि  शीर्ष स्थान (टप रेन्किङ) भित्रका १३ राष्ट्रहरूबीचको  फस्ट लिगमा रहेका या पुगेका तर ८ टिमभित्र नअटाएका अरु पुछारका ५ टिमहरू १. वेस्ट इन्डिज, २. दक्षिण अफ्रिका, ३. श्रीलङ्का, ४. आयरल्यान्ड, ५ जिम्बाव्बे र ६. नेदरल्यान्डसमध्येबाट १ टिम छानिएर ८ओैं टिम हुनेछन् । र, बाँकी पुछारमा रहेका ५ टिमले जिम्बाव्बेमा हुने क्वालिफायर म्याच (Qualifier Match खेल्नु पर्नेछ । 

त्यसैगरी विश्व वरीयतामा १४ देखि २० सम्म रहेका नेपाललगायतका ७ देशहरूबीचको सुपरलिग - २ हालै सकिएको छ र यसबाट छनोट भएका माथिल्ला तीन टिम अर्थात् १. स्कटल्यान्ड, २. ओमान, ३. नेपालसमेत गरी ३ टिम जिम्बाव्बेमा हुने क्वालिफायर (Qualifier) खेल्नका लागि छानिइसकेका छन् भने अब बाँकी २ टिम छानिन सुपरलिग -२ को टप तीनमा नपरेका बाँकी ४ टिम १. नामिबिया, २. युयसए, ३. युनाइटेड अरब इमिरेट्स र ४ पपुवा न्यु गिनीका साथै विश्व वरीयता (world ranking) मा २१ देखि ३२सम्म रहेका क्यानाडा, जर्सी, सिङ्गापुर, हङ्कङ मलेसियालगायतका १२ टिमको लिग म्याचमा प्रथम र दोस्रो भएका क्यानाडा र जर्सी गरेर दुई टिमसमेत छ टिमका बीचमा क्वालिफायर-प्लेअफ (Qualifier play-off) यही २६ मार्चदेखि ५ अप्रिलसम्म नामिबियामा हुँदै छ ।  त्यस प्लेअफका १५ ओटा म्याचबाट टप दुई टिम पनि छनोट भई नेपालजस्तै गरेर १८ जुनदेखिको क्वालिफायर म्याच खेल्न जम्मा १० टिम जिम्बाव्बे पुग्नेछन् । 

यसरी अन्तिममा हुने  विश्कपका लागि जिम्बाव्बे हुनलागेको १० टिम बीचको क्वालिफायर म्याचमा प्रथम र दोस्रो हुने २ टिममात्र विश्व कप-२०२३ (ICC WORLD CUP 2023  ) मा रिक्त २ स्थान पक्का गरी जम्माजम्मी १० टिमबीचमा क्रिकेटको एक दिवसीय खेफ हुनेछ भारतमा आगामी अक्टोबरदेखि नोभेम्बर महिनामा ।

यसरी लामो प्रयासपछि विश्व कपको उपाधिका खेल्न अन्तिममा १० टिम को छनोट हुनेछ । विश्व कपका लागि भने ५/५  टिमको दुई समूहमा लिग म्याच र त्यसपछि हरेक समूहको टप तीनमा छनोट भएर सुपर सिक्स लिग म्याच खेलेर अनि त्यसबाट टप चार टिमले सेमिफाइनल नकआउट खेल्नेछन् ।  अनिमात्र विश्वकप विजेताको टुंगो लाग्नेछ ।

तसर्थ, अन्तिम समयसम्म टिकेर विश्वकप खेल्नका लागि नेपालले अब आफ्नो खेल स्तर सुधार गर्दै वेस्ट इन्डिज, दक्षिण अफ्रिका, श्रीलङ्का, आयरल्यान्डलगायतका टिमहरूको स्तरमा पुर्याउनुपर्ने हुन्छ । अस्ति कीर्तिपुरमा भएको म्याचमा जस्तै एउटै ओभरमा ४ छक्का खान थाल्यो भने लाजमर्दो हुनेछ ।

जे होस्, अस्ति डीएलएस (DLS) रूपी भाग्यले नेपाललाई साथ दिएजस्तै आगामी दिनमा जिम्बाव्बेमा हुने  क्वालिफायर लिग म्याचमा समेत भाग्यले राम्रै साथ देओस् र हाम्रा खेलाडीको खेल स्तर अझै राम्रो होस् । साथै पुछारतिरका डेथओभरका ६ ओभरमा १०२ रन दिएर विपक्षीलाई विश्व रेकर्ड बनाउन नदिऊन् भन्ने अग्रिम शुभकामनासमेत सबैले दिऊँ !