अल्जियर्स । अल्जेरियाको एक अदालतले हत्या अरोपमा दोषी ठहरिएका ४९ जनालाई मृत्युदण्डको सजाय सुनाएको छ । 

उनीहरूमाथि गत वर्ष फैलिएको भयानक वन डढेलो सुरु गरेको आशंकामा एकजनाको हत्या गरेको अभियोग लागेको थियो ।

तर, अल्जेरियामा मृत्युदण्ड दिने कार्य अहिले रोक्का गरिएकाले उनीहरूको सजाय घटाएर आजीवन कारवासमा परिणत हुने बलियो सम्भावना रहेको छ । 

अल्जेरियाको इतिहासमै सबैभन्दा भयानक डढेलको कारण सन् २०२१ मा ९० जना मानिसले ज्यान गुमाएका थिए ।

वास्तवमा सामूहिक आक्रमणमा मारिने जामेल बेन इस्माइल नामक ती युवक आगलागीबाट अरूलाई जोगाउन जंगलमा गएका थिए । 

गत वर्षको अगस्टमा जंगलमा आगो फैलिएपछि ३८ वर्षीय जमालले काविली क्षेत्रको आगो निभाउने कार्यमा अरूलाई सहयोग गर्न आफूले घरदेखि ३२० किलोमिटर लामो यात्रा सुरु गर्न लागेको ट्विट गरेका थिए । सो क्षेत्र राजधानी अल्जियर्सदेखि पूर्वमा पर्छ । 

तर, दुर्भाग्यवश घटनास्थलमा पुगेका उनलाई स्थानीय व्यक्तिहरूले आगो सल्काएको आरोप लगाएका थिए । उनीहरूले अन्य शारीरिक यातना दिइसकेपछि उनलाई जिउँदै जलाएका थिए ।

बीबीसीबाट ।