इटहरी । सुनसरी निर्वाचन क्षेत्र नम्बर–२ ‘क’बाट प्रदेशसभा सदस्य पदको उमेदवार रहेका द्वारिकलाल चौधरी आसन्न निर्वाचनमा आफू विजयी हुने जिकिर गर्छन् । उनी केही समयअघि नेकपा (एमाले) परित्याग गरी नेकपा (माओवादी केन्द्र)मा प्रवेश गरेका थिए । मनोनयन दर्ता गराउनेभन्दा अलि दिनअघि माओवादी केन्द्रमा प्रवेश गरी टिकट पाएका हुन् ।

निर्वाचन प्रचारप्रसारका क्रममा उनी अहिले मतदाताको घरदैलोमा पुगिरहेका छन् । चौधरी जहाँ जहाँ पुग्छन्, त्यहाँ ‘इटहरीको पूर्वमेयर मै हो’ भन्दै भोट माग्छन् । घरअगाडिको बाटो आफैँले बनाएको भन्दै भोट दिन आग्रह गर्छन् ।

बिहीबार मत माग्दै इटहरी उपमहानगरपालिका–२ मा पुगेका उनले एक मतादातालाई हातमा टाउकोले ढोग्दै भने, “मै हो हजुर द्वारिकलाल, पूर्वमेयर । यसपटक प्रदेशमा उठेको छु, भोट दिनुपर्‍यो । हिजो मेयर हुँदा सडक, बाटो बना’को देख्नुभा’कै छ । अब अरू के भनौँ ।”

इटहरी उपमहानगरपालिकाका निवर्तमान मेयर चौधरीले त्यसैलाई आफ्नो निर्वाचन प्रचारको आधार बनाएका छन् । मेयर हुँदा गरेको कामको मूल्यांकन गर्दै जनताले आफूलाई मत दिने उनको जिकिर छ ।

मेयरको पाँचवर्षे कार्यकालमा इटहरीका २० वटै वडाका गाउँगाउँमा कालोपत्र सडक बनाएको उनी बताउँछन् । २० वटै वडालाई जोड्ने ‘लिंक रोड’ र ‘रिङ रोड’लाई कालोपत्र गर्दै ‘रोड कनेक्टिभिटी’ले जोडेको उनको भनाइ छ ।

उनले भने, “मैले मेयर हुँदा इटहरीका गाउँगाउँमा कालोपत्र बाटो बनाएको छु । लिंक रोड र रिङ रोड कालोपत्र भएको छ । बहुवर्षीय योजनाअनुसार धेरै ठूलाठूला परियोजनाहरू सञ्चालन भएका छन् । यो सबै देखेका जनताले मलाई भोट नदिएर कसलाई दिन्छन् ?”

विपक्षीलाई गाली 
द्वारिकलाल चौधरी अरूलाई गाली गरेर विवादित बनेका नेता हुन् । मेयर हुँदा उनी कहिले ‘पत्रकारको नाकको डाँडी भाँच्ने’ त कहिले ‘लोपार्नेकाण्ड’बाट निकै विवादित बनेका थिए । महिलाका विषयमा पनि उनको अभिव्यक्ति विवादमा परेको थियो ।

अहिले उनी नेकपा (एमाले)का नेता–कार्यकर्तालाई गाली गरिरहेका छन् । भीम आचार्य, रेवतीरमण भण्डारी र लक्ष्मी गौतमप्रति उनले आक्रोश पोख्ने गरेका छन् । उनीहरूले नै हिजो मेयरमा असफल बनाउन खोजेको उनको आरोप छ । ‘ठाउँ फेर्दै जनता झुक्याउने’ नेता भन्दै चौधरीले आचार्यको कटु आलोचना गर्ने गरेका छन् ।

संविधान निर्माण गरेको ‘क्रेडिट’ 
यसै क्षेत्रबाट प्रदेशसभा सदस्य पदको उमेदवार रहेका एमालेका उमेदवार रेवतीरमण भण्डारी पनि आफू विजयी हुने जिकिर गर्छन् । दोस्रो संविधानसभा सदस्य समेत रहेका भण्डारी संविधान लेखनका क्रममा आफूले प्रभावकारी भूमिका निर्वाह गरेको बताउँछन् । अहिले सोही कुरा उनी मतदातालाई सुनाइरहेका छन् ।

भोट माग्दै मतदाताको घरदैलोमा पुगेका बेला भण्डारी संविधान निर्माणका क्रममा गरेका कामबारे जानकारी गराउँछन् । त्यति बेला आफूले गरेको कामको मूल्यांकन मतदाताले गर्ने भण्डारीको विश्वास छ ।

इटहरी–१२ मा आयोजित चुनावी सभामा भण्डारीले देशको आर्थिक समृृद्धिका लागि एमालेलाई भोट दिनुपर्ने बताए । देशलाई आर्थिक हिसाबले समृद्ध बनाउन एमालेको सरकार नै चाहिने भण्डारीको भनाइ छ । विपक्षी गठबन्धनले समस्याको समाधान नगर्ने उनको तर्क छ ।

जनताप्रति समर्पित साझा व्यक्तिलाई मत दिनुपर्ने उनी बताउँछन् । “व्यक्तिगत जीवनभन्दा पनि साझा जीवनका लागि लागेको व्यक्ति भएको हिसाबले पनि अन्य उमेदवारलाई भन्दा मलाई भोट दिनुपर्छ,” उनले भने ।

थारु समुदायको मत कता जाला ? 
यस क्षेत्रमा माओवादी केन्द्रको आफ्नै प्रभाव त्यति छैन । थारु समुदायको मत आफ्नो पक्षमा पार्ने चौधरीको योजना छ ।

एमालेका उमेदवार भण्डारीको पनि थारु समुदायमा राम्रो प्रभाव देखिन्छ । भण्डारीले थारु समुदायको मत समेत पाउने थारु अगुवाहरू नै बताउँछन् ।

कांग्रेसको मत निर्णायक 
गएको स्थानीय तह निर्वाचनमा इटहरी उपमहानगरको मेयर जितेकाले नेपाली कांग्रेसका नेता–कार्यकर्ता उत्साहित थिए । तर, सुनसरी निर्वाचन क्षेत्र नम्बर–२ र ३ का प्रदेशसभा ‘क’ मा कांग्रेसका उमेदवार छैन्न । यी दुवै क्षेत्रमा कमजोर ‘पोजिसन’मा रहेको माओवादी केन्द्रका उमेदवार छन् ।

आफ्नो उमेद्वार नहुँदा कांग्रेसलाई गठबन्धनका तर्फबाट माओवादी केन्द्रका चौधरीलाई जिताउनुपर्ने बाध्यता छ । कांग्रेसको मत जसले पाउँछन्, उही उमेदवार विजयी हुने अवस्था छ ।

कांग्रेसले योपटक इमानदारीपूर्वक गठबन्धनमा भोट हाल्ने कांग्रेसका इटहरी नगर सचिव विक्रम घिमिरले बताउँछन् । निर्वाचन प्रसारप्रसारका क्रममा पनि कांग्रेसका सबै तहका कार्यकर्ताहरूको उत्साहपूर्वक सहभागिता  देखिएको उनको भनाइ छ ।

अंकगणित 
सुनसरी–२ ‘क’ मा इटहरी उपमहानगरपालिकाका १, २, ३, ४, ५, १६, १७, १८, १९ र २० नम्बर वडा पर्छन् । रामधुनी नगरपालिकाका ३ र ५ नम्बर वडा समेत सोही क्षेत्रमा पर्छन् ।

सुनसरी–२ ‘क’ मा १२ वडा छन् । तीमध्ये नौवटा वडा एमालेले जितेको छ । तीनवटामा कांग्रेस विजयी भएको छ । इटहरीमा पर्ने १० वडामध्ये एमालेले आठ र कांग्रेसले दुई वडा जितेको छ । रामधुनीमा कांग्रेस र एमालेले एक/एक वडा जितेका छन् ।

गएको स्थानीय तह निर्वाचनमा सत्ता गठबन्धनतर्फका वडाध्यक्ष पदका उमेदवारहरूले कुल २१ हजार ४१६ मत पाएका थिए । एमालेका वडाध्यक्ष पदका उमेदवारहरूले २१ हजार ४०१ मत ल्याएका थिए । यसरी हेर्दा सत्ता गठबन्धन र एमालेको मत बराबरजस्तै देखिन्छ । तर, त्यति बेला कांग्रेसको गठबन्धनमा रहेको जनता समाजवादी पार्टी (जसपा) अहिले एमालेसँग चुनावी तालमेलमा छ ।