काठमाडौं । नेपाली कांग्रेसको महासमितिको बैठकका विषयमा विभिन्न टिकाटिप्पणी भइरहेको भए पनि भदौभित्रै महासमिति बैठक बोलाउने तयारी गरिएको छ । त्यसको तयारीका लागि विधान संशोधन मस्यौदा समिति पनि बनाइएको छ भने केन्द्रीय समितिको बैठक पनि बोलाइएको छ ।

सभापति शेरबहादुर देउवा र नेता रामचन्द्र पौडेलबीच केन्द्रिय समिति बैठकले गरेको निर्णयअनुसार नै भदौ महिनाभित्रै महासमिति बैठक बोलाउने सहमति भएको कांग्रेस स्रोतले जनाएको छ ।

गत वैशाख १६ गते सम्पन्न कांग्रेसको केन्द्रीय कार्यसमिति बैठकले भदौ महिनाभित्रै महासमिति बैठक बोलाएर पार्टीको संगठनलाई मुलुकको संघीय ढाँचा अनुरुप विस्तार गर्ने निर्णय गरेको थियो । सोही निर्णय बमोजिम कांग्रेसले बिहीबार नै महामन्त्री पूर्णबहादुर खड्काको संयोजकत्वमा ११ सदस्यीय विधान संशोधन मस्यौदा समिति गठन गरेको छ । 

महामन्त्री खड्का संयोजक रहेको समितिमा डा. मिनेन्द्र रिजाल, फरमुल्लाह मंसुर, मानबहादुर विश्वकर्मा, दिलेन्द्रप्रसाद बडू, महालक्ष्मी उपाध्याय ‘डिना’, आनन्दप्रसाद ढुंगाना, नविन्द्रराज जोशी, सीता गुरुङ, प्रदीप पोडेल र रमेश लेखक रहेका छन् । 
यसअघि यही समिति गठनमा ढिलाई भएका कारण कांग्रेस वृत्तमा सभापति देउवाले भदौ महिनामा महासमिति बैठक बोलाउन नचाहेको टिप्पणी हुँदै आएको थियो ।  

कांग्रेस नेतृत्वको प्रभावशाली नेताहरुले नै विभिन्न टिकाटिप्पणी हुन थालेपछि मस्यौदा समिति बनाउन नेताहरु तातिएका थिए । बिहीबार बसेको पदाधिकारी बैठकमा उनले स्पष्ट रुपमा महासमिति बैठकलाई भदौ महिनाभन्दा पछाडि सार्न नसकिने कुरा राखेको स्रोतले जनाएको छ । 

‘‘म भदौभन्दा उता सार्ने कुरामा सहमत हुन्न । रातदिन लगाएर तयारी गरेर भएपनि महासमिति बैठक गर्नुपर्छ भन्नेमा सभापति हुनुहुन्छ,’’ बैठकमा सहभागी स्रोतले भन्यो, ‘‘उहाँले भदौभित्रै महासमिति हुनुपर्छ, सार्ने कुरो हुँदैन भनेर तयारीमा लाग्नुस् भन्नुभएको छ ।’’ 

कांग्रेस प्रवक्ता विश्वप्रकाश शर्माले पनि सभापति देउवाको भदौ महिनाभित्रै महासमिति बोलाउने मनस्थिति रहेको पुष्टि गरेका छन् । उनी बिहीबार गठन भएको विधान संशोधन मस्यौदा समितिले लगातार रुपमा पाएको जिम्मेवारी अनुरुप काम सम्पादन गरे भदौ अन्तिम साता महासमिति बैठक बोलाउन सकिनेमा ढुक्क देखिन्छन् । 

‘‘केन्द्रीय समिति बैठकले महासमति बैठक भदौमा भनेर निर्णय गरेको छ । रातदिन काम गरेर विधान मस्यौदा समितिले १५–२० दिन तयारी गरेपछि भदौ मसान्तमा महासमिति गर्न सकिन्छ,’’ प्रवक्ता शर्माले बाह्रखरीसँगको टेलिफोन कुराकानीमा भने, ‘‘२२–२३ दिन अझै बाँकी छ । शुक्रबार बिहान विधान संशोधन मस्यौदा समितिको पहिलो बैठक छ । यो बीचमा कस्सिएर लाग्यो भने भदौमै महासमिति हुन्छ ।’’ 

प्रवक्ता शर्माका अनुसार नवगठित विधान संशोधन मस्यौदा समितिको पहिलो बैठक शुक्रबार बिहान ९ वजे बस्दैछ । समितिले सभापतिसँग परामर्श गरेर आफ्नो कार्याविधि आफैँ तयार गरेर लागू गर्ने र समिति संयोजकले आवश्यकता अनुसार विभिन्न व्यक्ति र संस्थाहरुलाई समितिमा आमन्त्रण गर्न सक्ने अधिकार पाएको छ ।  

कांग्रसले शुक्रबार नै केन्द्रीय कार्यसमितिको बैठक पनि बोलाएको छ । बिहान ११ बजेका लागि बोलाइएको बैठकमा महासमिति बैठकको तयारीसँग सम्बन्धित आवश्यक पर्ने निर्णयहरु गरिने प्रवक्ता शर्माले जानकारी दिएका छन् ।