विश्वकप फुटबलमा सनसनीपूर्ण नतिजाहरु आउने क्रम जारी छ । यस प्रतियोगिताकै प्रियपात्र टिम भनिएको जर्मनीलाई मेक्सिकोले हराएर स्तब्ध पारिदियो । ब्राजिल र अर्जेन्टिनालाई तुलनात्मकरुपमा कमजोर भनिएका टिमहरु स्विटजरल्यान्ड र आइसल्यान्डले बराबरीमा रोकिदिए । छनोट चरणमा अपूर्व खेल प्रदर्शन गरेको स्विटजरल्यान्ड भने ’छुपे रुस्तम’ टिम हुनसक्ने अवस्थामा छ । आइसल्यान्डले युरोकपमा देखाएको चमत्कारलाई निरन्तरता दियो । अर्कोतर्फ छनोट चरणमा उत्कृष्ट रहेको पोल्यान्डलाई सेनेगलले पाठ सिकायो । इङल्यान्ड भने आफ्नो परम्परागत खेलभन्दा केही फरक ढंगमा प्रस्तुत हुँदै अफ्रिका महादेशकै ’टप र्‍यांकिङ’ टिम ट्युनिसिया लाई २ —१ ले हराउँदै समर्थक र आफ्नै टिमको मनोबल उच्च राख्न सफल रह्यो ।

ह्यारी केनको उत्कृष्ट प्रदर्शन र अन्य खेलाडीहरुको अनुभव र दक्षताको सम्मिश्रणले गर्दा यो विश्वकपकै पूर्वार्धमा सबैभन्दा धेरै पोस्ट आक्रमण गर्ने टिम बनेको छ इंङ्लिस टोली । मेरा ट्विटर मित्र इस (@iShzz ) ले त त्यो प्रदर्शनलाई “के यो विश्वकप जित्ने लक्षण हो ?“ भन्दै उत्साहपूर्ण ट्विट गरेका छन् । पहिलो खेलमा ह्यारी केनले नै दुवै गोल गरे । केही समयमात्र मैदान छिरेका युवा खेलाडी मार्कस रास्फोर्ड र रुबेन लोफ्टुसले निकै उच्चस्तरको खेल प्रदर्शन गरे । समग्रमा तीन सिंहको टिमले उच्च मनोबल कायम राख्दै र उच्च तहको खेल प्रदर्शन गर्दै आगामी खेलहरुका प्रतिद्वन्द्वीहरुलाई खुला चुनौती दिएका छन् भने समर्थकहरुको शिर झुक्न दिएका छैनन् । अब पनामासँग आइतवार हुने दोस्रो खेल जितेर आफ्नो दोस्रो चरणको स्थान लगभग पक्का गर्ने दाउमा छ इंङ्लिस टिम ।

ह्यारी केनको अबको लक्ष गोल्डेन बुटसहित विश्वकप उचाल्ने हुनेछ । पनामा र बेल्जियमसँगको खेलमा आफ्नो गोल संख्या थप्दै यो दाबेदारीलाई थप मजबुत बनाउने दाउमा छन् ह्यारी । डेली अल्ली, वाकर, स्ट्रलिङ र लिनगार्डको सहयोगमा अनुभवी खेलाडी एस्ले योङको खेल मिसिँदा ह्यारी केनको यो लक्ष्य पूरा हुनसक्ने देखिन्छ । इङल्यान्डका गोल मेसिन केनलाई रोक्न निकै गाह्रो छ । अझै उनको हेडिङ क्षमता त निकै तिखारिएर आएको छ । ट्रिप्पिएरको फ्री किक र कर्नर किक केली वाकरको पहाडजस्तो छेकबार र गोल किपरको चुम्बक जस्तो क्षमताले यस टोलीलाई थप मजबुत बनाएको छ ।

यता सामाजिक सञ्जालमा नेपाली समर्थकहरु सेलाउने र तात्तिने क्रम पनि उत्तिकै छ । जर्मनको पहिलो हारपछि उनीहरुका समर्थक केही शान्त देखिएका छन् भने ब्राजिल र अर्जेन्टिना अनि स्पेनका समर्थकहरु पनि पहिलो खेलपछि केही मथ्थर बनेका छन् । मेरो पहिलो ब्लगमा लेखेजस्तै भलादमी पारा देखाउने इङ्ल्यान्डका समर्थकहरु भने जित हुँदा पनि उही पारामै छन् । मनोबल बढेको अवस्थामा अर्को जितको प्रतिक्षामा मात्र बसेका छन् । इङ्ल्यान्डभित्रै भने पबहरुको बाहिर पेय पदार्थले मातिएका युवाले सडक नै कब्जा गरेर खुसी मनाइरहँदा धेरै ठाँउमा प्रहरीले हस्तक्षेप गर्दै बाटो खुलाएको थियो ।

फुटबल खेल गोल गर्नेले नै जित्ने हो, सीप प्रदर्शन गरेर पनि गोल गर्न नसके त्यसको कुनै महत्त्व हुँदैन । पहिलो चरणका अहिलेसम्मका खेल हेर्दा स्पेन, पोर्चुगल र रसिया गोल गर्ने क्षमतामा अब्बल देखिए । यस्ता टिमहरुलाई पाखा लगाएर विश्वकप उचाल्न इङ्लिस टिमलाई पक्कै सहज भने हुनेछैन । अर्कोतिर परम्परागत फुटबल ’पावर हाउस’ ब्राजिल र अर्जेन्टिना पनि आफ्नो लयमा फर्किन सक्छन् । तैपनि पहिलो खेल हेर्दा इङिलस टिमको सामूहिक प्रदर्शन हेर्न लायक छ  । यस लयलाई निरन्तरता दिनसक्ने हो भने ह्यारी केनको गोल्डेन बुटको लक्ष्यमात्र होइन विश्वकप नै यो टिमले उचाल्ने सम्भावना प्रबल देखिन्छ ।

गारेथ साउथगेटको यो टिममा एक से एक खेलाडी छन् । जेमी भार्डी र गेरी काहिलजस्ता खेलाडीले पहिलो खेलमा स्थान पाउन सकेनन् । सबै खेलाडी उत्कृष्ट लयमा र शारीरिकरूपमा तन्दुरुस्त रहेको हुनाले खेलको राणनीति र आवश्यकताअनुसार जो कोही पनि टिममा छानिन सक्ने अवस्थामा छ साउथगेट । पहिलो चरणको सबै खेल जितेर समूहमा पहिलो हुँदै दोस्रो चरणमा समूह ’एच’को उपविजेतासँग खेल्ने दाउमा छ यो टिम । समूह ’एच’बाट जुनसुकै टिम आए पनि इङ्लिस टिमको लागि सहज हुने मानिएको छ । यस अर्थमा अन्तिम आठमा पुग्न कुनै कठिनाइ छैन तीन सिंहको टिमलाई । त्यसपछिका अरु ३ खेल जित्दै विश्वकप भित्र्याउने दाउमा छ साउथगेटको फुटबल सेना ।