काठमाडौं । आक्रमणको स्थितिमा नागरिकलाई सुरक्षा प्रदान गर्न जिम्मेवार संघीय एजेन्सीका प्रमुखले जर्मनीको पुरानो र जीर्ण बंकर नेटवर्कमा ठूलो सुधार आवश्यक भएको बताएका सीएनएनले जनाएको छ ।

संघीय नागरिक सुरक्षा र विपत्ति राहत एजेन्सीका अध्यक्ष राल्फ टिएस्लरले एक जर्मन पत्रिकालाई दिएको अन्तर्वार्तामा भने, “लामो समयसम्म जर्मनीमा यो विश्वास व्यापक थियो कि हामीले युद्धको तयारी गर्न आवश्यक छैन । अब त्यो धारणा परिवर्तन भएको छ । हामी युरोपमा ठूलो आक्रमणको जोखिमबारे चिन्तित छौँ ।”

टिएस्लरको यो भनाइले रुसले चार वर्षभित्र युरोपमा फेरि आक्रमण गर्ने प्रयास गर्न सक्छ भन्ने युरोपभर फैलिएको वास्तविक डरलाई प्रतिनिधित्व गर्छ । यो अवधिलाई रुसले युक्रेनमा लामो र रक्तरञ्जित युद्धपछि पुनः सैन्य शक्ति जुटाउन आवश्यक न्यूनतम समय मानिन्छ ।

उक्त पत्रिकाका अनुसार, जर्मनीमा हाल ५८० मात्र बंकर छन् । तीमध्ये धेरै चालु अवस्थामा छैनन् । यो संख्या शीतयुद्धकालीन दुई हजार बंकरको तुलनामा निकै कम हो ।

हाल जर्मन जनसंख्याको मात्र ५ प्रतिशतले आक्रमण भएमा बंकरभित्र शरण लिन सक्ने जनाइएको छ । जर्मनीको जनसंख्या लगभग आठ करोड ३० लाख छ ।

नागरिक सुरक्षा एजेन्सी प्रमुखले सुरुङ, मेट्रो स्टेसन, भूमिगत ग्यारेज र सार्वजनिक भवनको अन्डरग्राउन्डलाई उन्नत बनाएर १० लाख भूमिगत आश्रयस्थल चाँडो सिर्जना गर्ने र राष्ट्रिय साइरन एवं सूचना प्रणाली विस्तार गरिने बताए ।