काठमाडौं । फोटो पत्रकार प्रकाश चन्द्र तिमिल्सेनाले भूकम्पको दश वर्षमा बारपाकमा देखिएको परिवर्तन तथा पुनर्निर्माणका चुनौतीलाई दस्तावेजीकरण गरिएको फोटो प्रदर्शनी आयोजना गरेका छन् । 

बारपाकमा आयोजित प्रदर्शनीमा भूकम्प गएपछिको अवस्था, बारपाकको आर्थिक अवस्था तथा सामाजिक भोगाइसँग सम्बन्धित ६० वटा तस्बिर प्रदर्शनमा राखिएका छन् ।  

प्रदर्शनीको उद्घाटन नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले गरे । उनले प्रदर्शनीमा राखिएका सबै तस्बिर अवलोकन गरेका थिए । 

अध्यक्ष प्रचण्डसँगै गण्डकी प्रदेशका मुख्यमन्त्री सुरेन्द्रराज पाण्डे, नेकपा माओवादी केन्द्रका नेता नारायणकाजी श्रेष्ठ र बारपाक सुलिकोट गाउँपालिकाका अध्यक्ष विष्णुप्रसाद भट्टले पनि फोटो प्रदर्शनी अवलोकन गरेका आयोजकले प्रेस नोटमा उल्लेख गरेका छन् ।  

अध्यक्ष प्रचण्डले भूकम्पबाट क्षतिग्रस्त गोरखाका भौतिक संरचनाको बाँकी पुनर्निर्माण सम्पन्न गर्न आवश्यक सहजीकरण गर्ने प्रतिबद्धता जनाए ।