काठमाडौं । टेलिकम सेवाप्रदायक एनसेलका प्रमुख कार्यकारी अधिकृत (सीईओ) जाब्बोर कायुमोभले डिजिटल नेपालको फ्रेमवर्कमा एनसेलले सधैँ सहयोग गर्ने बताएका छन् ।

शनिबार बाह्रखरी मिडियाले काठमाडौंमा आयोजना गरेको 'आर्थिक परिसंवाद'मा उनले नेपालको आर्थिक विकासमा आईटी क्षेत्रको ठूलो सम्भावना रहेको बतााए । यसमा एनसेलले सरकारसँग मिलेर काम गर्न चाहेको उनको भनाइ छ ।

आईटीको निर्यातले प्रत्यक्ष र अप्रत्यक्षरूपमा रोजगारी सिर्जना गर्ने भएकाले नेपालबाट रोजगारीका लागि बाहिरिनेमा पनि कमी आउने उनको विश्वास छ ।

"सरकारले ३० खर्बको आईटी निर्यात गर्ने लक्ष्य राखेको छ, यसमा एनसेल हातेमालो गर्न चाहन्छ," उनले भने ।

कायुमोभले नेपालले लिएको आर्थिक उदारीकरणकै कारण बैंक तथा वित्तीय संस्था र ठूला अन्तर्राष्ट्रिय कम्पनी भित्रिएको पनि बताए ।