काठमाडौं । प्रधानमन्त्री केपी शर्मा ओलीले भारतीय प्रधानमन्त्री नरेन्द्र मोदी ‘सगरमाथा संवाद’का निम्ति नेपाल नआउने बताएका छन् । सगरमाथा संवादको समयमा नै मोदीले युरोपको भ्रमण गर्ने कार्यक्रम तय भइसकेकाले नेपाल आउन नपाउने तर भारतबाट उच्चस्तरको प्रतिनिधि सहभागी हुने उनले जानकारी गराए ।

थाइल्यान्डको औपचारिक भ्रमण सकाएर शनिबार (चैत २३) स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थलमा सञ्चारकर्मीसित बैंककमा मोदीसँग आफ्नो सुमधुर भेट भएको बताए । उनले पारस्परिक सहयोगका विभिन्न क्षेत्रका सम्बन्धमा र पञ्चेश्वर आयोजना, व्यापार, दोधारा चाँदनीमा महाकालीबाट सिँचाइ गर्ने विषयमा छलफल भएको जानकारी दिए ।

नेपाल–भारत सम्बन्धलाई अझ विस्तृत, सुदृढ गर्दै लैजाने र देखिएका समस्यालाई तत्काल छलफल गरी टुंग्याउने बारेमा समझदारी भएको उनले बताए । 

“... यो भेटघाट फलदायी भयो र खुसी छु । उहाँको कुराकानीबाट उहाँ पनि खुसी हुनुहुन्छ भन्ने मैले पाएको छु,” उनले भने, “भारत भ्रमण असम्भव कुरा थियो र ? कतिपय कारणले नभ्यारहेको स्थितिले मात्रै हो । अवरुद्ध भयो भन्नेजस्तो बाहिर छ, त्यस्तो होइन ।”

उनले भने, “काँडेतार लगाएको छ र कसैले ? त्यस्तो होइन । ठिकै ढंगले बुझ्दा हुन्छ । हामीले भ्याउँछौँ भन्यौँ भने सगरमाथा संवादअघि भारत भ्रमण हुन पनि सक्छ ।”

प्रधानमन्त्री ओलीले नेपालबाट भारत भ्रमण सगरमाथा संवादका कारण केही व्यस्तता रहे पनि आफूले समय मिलाउनसके हुन सक्ने बताए । न्युज एजेन्सी नेपाल