विराटनगर । विराटनगरस्थित नोबेल मेडिकल कलेज एन्ड टिचिङ अस्पतालका चिकित्सकको लापरबाहीका कारण आफ्नी आमाको निधन भएको भन्दै छोराले चिकित्सकविरुद्ध मुद्दा दायर गरेका छन् ।

फोक्सो एवं श्वासप्रश्वाससम्बन्धी समस्याबाट ग्रसित सुनसरी इनरुवाकी विमला थापा पोखरेललाई हाडजोर्नीको औषधि चलाइँदा मृत्यु भएको दाबी गर्दै श्रीमान् महेश्वर पोखरेलले जिल्ला अदालत मोरङमा फिराद पत्र दर्ता गराएका छन् । बिहीबार पत्रकार सम्मेलन गरी मृतकका छोरा सुशान्तरमण पोखरेलले घटनाबारे पत्रकारहरूलाई जानकारी गराउँदै आफू न्यायको लडाइँमा भएको सुनाए ।

उनले भने, “गत माघ १० गते आमालाई सामान्य श्वासप्रश्वासको समस्या देखिएपछि अस्पताल भर्ना गरियो । फोक्सो एवं श्वासप्रश्वास विशेषज्ञ डा. रामहरि घिमिरेले बिरामी चेकजाँच गर्नु भएको हो । आमाको ढाड दुखाइको पनि समस्या थियो । घिमिरेले निको बनाइदिने भन्दै औषधि दिएपछि आमा झन् सिकिस्त भएर बित्नुभयो ।”

दुखाइको समस्या समाधान गरिदिने भन्दै मर्फिन नामक औषधि ओभरडोज दिएपछि आमाको निधन भएको पोखरेलले दाबी गरे । उनले भने, “५० एमजीका दरले तीनपटक औषधि दिएपछि आमाको अक्सिजन लेभल एक्कासि घट्यो हतार हतार आईसीयूमा भर्ना गरिदिए तर उहाँ फर्कनु भएन ।” आफूले अन्य चिकित्सकहरूसँग परामर्श गर्दा दमको समस्या भएको बिरामीलाई त्यति धेरै डोज मर्फिन दिन नहुने भन्ने सुझाव आएको उनले सुनाए ।

बिरामीको मृत्यु भएपछि लापरबाही गर्ने चिकित्सकलाई कानुनी कारबाहीको माग गर्दै परिवारले अदालतको ढोका ढकढक्याएको जनाइएको छ । मृतकका श्रीमान् महेश्वर पोखरेलले मोरङ जिल्ला अदालतमा बिहीबार फिरादपत्र दर्ता गराएका छन् ।

ओपिडीमा स्वास्थ्य जाँच गरेपछि फोक्सोसम्बन्धी दीर्घकालीन अवरोध रोग सी ओपीडी र रक्तअल्पताको समस्या देखिएको चिकित्सकले सुरुमा बताएको पोखरेलले बताए । अस्पतालमा भर्ना भइ उपचार गर्ने क्रममा आमाले ढाडको समेत समस्या भएको सुनाएपछि चिकित्सक घिमिरेले मर्फिन चढाएको बताइएको छ ।

विभिन्न परीक्षणपश्चात् डाक्टर घिमिरेको रेखदेखमा पोखरेलको उपचार भएको र उनैको सुझावअनुसार एक हप्तापछि डिस्चार्ज गर्न परिवारलाई सुझाव दिएको तर ढाडको समस्या पनि रहेको बताएपछि औषधि दिएको पोखरेलले सुनाए ।

"स्वास्थ्यमन्त्रीको भ्रमणका कारण विपक्षी (अस्पताल)ले डिस्चार्ज गर्न नमिल्ने जानकारी दिनुभयो । हामी अस्पतालमा बस्न बाध्य भयौँ," मृतकका श्रीमान् अदालतमा दायर गरेको फिरादपत्रमा उल्लेख छ ।

“२०–२५ वर्षदेखि सामान्य दुखाइको अर्थोपेडिक डाक्टरले नहेरेर चिकित्सक  घिमिरेले हतार नगर्न बताउँदै एलबीपी (ढाडको तल्लो भागको दुखाइ ठीक हुने औषधि) लेखी दिनुभयो,” उनले भने, “मर्फिन नामक औषधि खान दिएपछि मेरी श्रीमतीको स्वास्थ्य अवस्था गम्भीर बन्यो ।”

मोर्फिन एक शक्तिशाली ओपिओइड एनाल्जेसिक (पेनकिलर) भएको र श्वासप्रश्वासका बिरामी, नसासम्बन्धी रोग, गम्भीर मिर्गौला, एलर्जी र कलेजोका बिरामी र गर्भवती महिलालाई दिन नहुने चिकित्सकहरूले बताएको छोरा सुशान्त रमणले बताए । आमा बिरामी भएपछि आफू पढाइ छाडेर अस्ट्रेलियाबाट आएको र चिकित्सकको हेलचेक्र्याइँविरुद्ध कानुन व्यवसायी, उपभोक्ता अधिकारवादी र चिकित्सकहरूकै परामर्शमा न्यायको लागि अदालत पुगेको सुनाए ।

पोखरेल परिवारले संविधानको धारा ४२ (२), उपभोक्ता संरक्षण ऐनको दफा ३ को ५० र ५१ बमोजिम क्षतिपूर्ति मागेको छ । पाँच करोड रुपैयाँ क्षतिपूर्तिमार्फत विपक्षीबाट असुलउपर हुनुपर्ने मागदाबी गरिएको छ ।