काठमाडौं । नेपालका घोषित एक मात्र डलर अर्बपति विनोद चौधरीको सम्पत्ति बढेर दुई अर्ब डलर पुगेको छ । व्यावसायिक घरना चौधरी ग्रुपका अध्यक्ष रहेका उनको सम्पत्ति गत वर्षको तुलनामा यसवर्ष २० करोड अमेरिकी डलरले बढेको फोर्ब्सले जनाएको छ । गत वर्ष सन् २०२४ मा उनको सम्पत्ति एक अर्ब ८० करोड अमेरिकी डलर थियो । यसवर्ष बढेर दुई अर्ब डलर पुगेको चर्चित म्यागजिन फोर्ब्सले जनाएको छ ।

चौधरी फोर्ब्सको धनीको सूचीमा १७ सय ६३ स्थानमा छन् । चौधरीले सीजी कर्प ग्लोबललाई कन्ट्रोल गर्दै आएका छन् । चौधरीको नेपालमा नबिल बैंक र वाइवाइ चाउचाउ उत्पादक सीजी फुड्सका साथै होटेलमा ठूलो लगानी रहेको छ ।

चौधरीको वाइवाइ चाउचाउ भारत, सर्बिया, बंगलादेशमा उत्पादन भइरहेको छ । यसैगरी अफ्रिकी मुलुक इजिप्टमा पनि वाइवाइ चाउचाउ उत्पादन गर्ने कारखाना निर्माणको चरणमा रहेको छ ।

चौधरीको ठूलो आम्दानी चेन होटलबाट आउने गरेको छ । उनले भारतको ताज ग्रुपसँगको साझेदारीमा पाँचतारे लक्जरियस होटेलहरू सञ्चालन गर्दै आएका छन् । यसैगरी उनका छोरा निर्वाण चौधरीले नेपालमा रहेको बिजनेस सम्हाल्दै आएका छन् भने राहुल र वरुण चौधरीले विदेशको व्यवसाय हेर्दे आएका छन् ।

६९ वर्षीय चौधरी सन् २०१६ मा पहिलोपटक फोर्ब्सको डलर अर्बपति सूचीमा प्रवेश गरेका हुन् । त्यसबेला उनको कुल सम्पत्ति एक अर्ब १० करोड डलर थियो । त्यसपछि उनको सम्पत्ति निरन्तर बढेको थियो ।

फोर्ब्सले बुधबार सार्वजनिक गरेको ३९औँ अर्बपतिको सूचीमा तीन हजार जनासँग धनीसँग कुल १६० खर्ब (१६ ट्रिलियन) डलर सम्पत्ति रहेको जनाएको छ । सबैभन्दा धनीमा अमेरिकाका टेस्ला गाडी उत्पादक एलन मस्क भएका छन् । ५३ वर्षीय मस्कको सम्पत्ति घटेर तीन खर्ब ४२ अर्ब डलरमा सीमित भएको छ । उनी सामाजिक सञ्जाल एक्सका मालिक पनि हुन् ।

यस्तै, दोस्रो स्थानमा फेसबुकका सहसंस्थापक मार्क जुकरवर्ग भएका छन् । उनको सम्पत्ति दुई खर्ब १६ अर्ब डलर रहेको छ । भारतका मुकेश अम्बानीको फोर्ब्सको सूचीमा १८औँ स्थानमा छन् । उनको कुल सम्पत्ति ९२ अर्ब ५० करोड डलर रहेको छ ।