काठमाडौं । अमेरिकी राष्ट्रपति डोनाल्ड ट्रम्पले युक्रेनका राष्ट्रपति भ्लोदोमिर जेलेन्स्की खनिज सम्झौताबाट पछि हट्न लागेको आरोप लगाएका छन् । जेलेन्स्कीले अमेरिकासँग खनिज सम्झौता गरे युक्रेनको युरोपियन युनियन (ईयू)को सदस्यता प्राप्तिमा खतरा पर्ने देखिए हस्ताक्षर नगर्ने बताएपछि ट्रम्पको भनाइ आएको हो ।

जेलेन्स्की पछि हटे उनलाई ठूलो समस्या आइपर्ने ट्रम्पको भनाइ छ । खनिज सम्झौताको नयाँ संस्करणले संयुक्त लगानी कोषमार्फत अमेरिकालाई युक्रेनको तेल, ग्यास र खनिजप्रति पहुँच गराउने र दुवै देशहरूको राजस्व बाँड्ने प्रावधान रहेको बताइएको छ ।

तर, यस सम्झौताले ईयूको आर्थिक सम्प्रभुतासम्बन्धी नियमको उल्लंघन गर्ने विषय उठेपछि जेलेन्स्कीले खनिज सम्झौताले युक्रेनको ईयूमा सदस्यता प्राप्तिलाई खतरा पारेर हस्ताक्षर नगर्ने बताएका थिए ।

यसैबीच रुसले आफ्नै दुर्लभ खनिज र खनिज सम्झौताको विषयमा अमेरिकासँग छलफल सुरु गरेका बताइएको छ ।

द टेलिग्राफबाट ।