काठमाडौं । नेपाली कांग्रेसका महामन्त्री विश्वप्रकाश शर्माले राजावादीको प्रदर्शनमा भएका घटनाको नैतिक जिम्मेवारी पूर्वराजा ज्ञानेन्द्र शाहले लिनुपर्ने बताएका छन् । आइतबार संसद् भवन नयाँ बानेश्वरमा सञ्चारकर्मीसँगको कुराकानीका क्रममा महामन्त्री शर्माले शुक्रबारको घटनामा पूर्वराजा शाह पूणरूपमा दोषी रहेको बताए ।

पूर्वराजालाई संविधानले नागरिकलाई दिएको हकभन्दा बढी दिएर राखिएको भए पनि उनले सम्मान गर्न नसकेको शर्माको भनाइ छ ।

"आज पूर्वराजाले नैतिक जिम्मेवारी लिनुपर्छ कि पर्दैन ? मान्छे मारिएको घटनामा बोल्नुपर्छ कि पर्दैन ? कस्तो राजसंस्था खोजेको हो ? पत्रकारसमेत मारिँदै गर्दा दु:ख लाग्यो भनेर कुनै पत्रिकाबाट छापिने गरी विज्ञप्ति पठाउनुपर्छ कि पर्दैन ?," शर्माले प्रश्न गरे ।

उनले मुलुकमा भएका घटनाबारे सदनमा विषय राख्न नपाउने अवस्था सिर्जना भएको र यसमा सिंगो संसद् नै दोषी भएको धारणा राखे । प्रधानमन्त्रीले सदनमा जवाफ दिने भनिसक्दा पनि अहिलेको अवस्थामा सदन अवरुद्ध गर्नु उचित नहुने उनको भनाइ छ ।