काठमाडौं । प्रधानमन्त्री केपी शार्मा ओलीले प्रमुख प्रतिपक्षी दलका नेता पुष्पकमल दाहाल 'प्रचण्ड'लाई एउटा कर्मचारीको विषयमा नअड्किन आग्रह गरेका छन् । नेपालको संक्रमणकालीन न्याय प्रक्रिया तथा द्वन्द्व पीडितहरूको सत्य, न्याय र परिपूरणीय अधिकारसम्बन्धी राष्ट्रिय सम्मेलनको उद्घाटन समारोहमा ओलीले  शान्ति प्रक्रियासँग एउटा कर्मचारीको साइनो नहुने बताए ।

“शान्ति प्रक्रिया अघि बढाउने आयोग गठनका लागि सर्त कमिटी बनाएकै दिन हटाइदिइएको भनेर टिप्पणी गरेको सुनेँ । शान्ति प्रक्रियासँग एउटा कर्मचारीको साइनो के हो ?,” ओलीले भने, “म प्रमुख प्रतिपक्षलाई ननइस्यूमा नअल्झन, ननइस्यूलाई इस्यू नबनाउन र देशका मूल समस्या सम्बोधनको सवाल उठाउन आग्रह गर्छु ।”

ओलीले शान्ति प्रक्रिया प्रधानमन्त्री वा सरकारले मात्र गरेर नहुने भएकाले सहकार्यका लागि आह्वान गरे । एउटा कर्मचारी राख्ने वा हटाउने विषय संसद्‌मा हंगामा गर्ने विषय नभएको र प्रधानमन्त्रीले जवाफ दिनुपर्ने विषय पनि नभएको ओलीको भनाइ छ ।

“देशमा मूल विषयहरूमा सहकार्य गरौँ । शान्ति प्रक्रियाजस्ता विषयमा सरकार वा प्रधानमन्त्रीले मात्र गरेर नहुने रहेछन् । त्यसमा प्रमुख प्रतिपक्षले सहकार्य गरोस्,” ओलीले भने, “यो सरकार अधिनायक होइन, लोकतान्त्रिक हो । आलोचना सहन तयार छौँ, तर समाज नभाडौँ ।”

उनले १८ वर्षदेखि शान्ति प्रक्रियाले पूर्णता नपाउँदा देशको प्रतिष्ठामा प्रश्न उठिरहेको भन्दै संयुक्त राष्ट्रसंघमा गरेको प्रतिबद्धता पूरा नहुँदा राम्रो सन्देश नजाने बताए ।

यस कार्यक्रममा शीर्ष दलका तीन नेताहरू एउटै मञ्चमा छन् ।