काठमाडौं । नेपाल स्टक एक्सचेन्ज (नेप्से)को प्रमुख कार्यकारी अधिकृत (सीईओ)मा नारद लुइँटेल नियुक्त भएका छन् ।

सोमबार साँझ बसेको मन्त्रिपरिषद् बैठकले लुइँटेललाई सीईओ नियुक्त गरेको हो ।

लुइँटेल तारागाउँ विकास समितिको पूर्वअध्यक्ष र सदस्य–सचिव हुन् । प्रेम आले पर्यटनमन्त्री भएका बेला उनले तारागाउँ विकास समितिको सदस्य–सचिवको जिम्मेवारी दोस्रोपटक पाएका थिए ।

उनी नेपाल पर्यटन तथा होटेल व्यवस्थापन प्रतिष्ठान (नाथम)को कार्यकारी निर्देशक पनि भएका थिए । उनले नाथममा करिब सात महिना काम गरे । सुदन किराती पर्यटनमन्त्री भएको बेला उनले नाथमको कार्यकारी निर्देशकबाट राजीनामा दिएका हुन् ।

लुईंटेलले त्रिभुवन विश्वविद्यालयबाट वाणिज्य विषयमा स्नातकोत्तर गरेका छन् ।