गोरखा । नेपाल कम्युनिस्ट पार्टी (माओवादी केन्द्र)का महासचिव देव गुरुङले देशलाई अस्थिरतातर्फ धकेल्ने षड्यन्त्र भइरहेको बताएका छन् ।

तमु मुक्तिमोर्चा गोरखाको छैटाँै जिल्ला सम्मेलनको शनिबार (चैत ९) उद्घाटन गर्दै उनले देशमा राजतन्त्र फर्काउने बहानामा चलखेल र षड्यन्त्र भइरहेको बताए । “प्रतिगामी शक्तिहरूले उचाल्ने, पछार्ने र राष्ट्रिय राजनीतिमा अस्थिरता सिर्जना गर्न खोजिरहेका छन् । अब देशमा गणतन्त्रको विकल्प छैन,” महासचिव गुरुङले भने, “यो अवस्थालाई ध्यानमा राखेर प्रतिगमनको विरोध र भन्डाफोर गर्नुपर्छ ।’’

उनले कुनै सरकार असफल भएमा त्यसको विकल्प अर्को पार्टी र व्यक्ति हुने बताए । राजसंस्था कुनै पनि अवस्थामा विकल्प हुन नसक्ने उनले धारणा राखे ।

मुलुकको परिवर्तनका निम्ति माओवादीले सबैलाई गोलबन्द गरेर अगाडि बढ्नुपर्नेमा उनले जोड दिए । उनले माओवादीले फेरि अभिभावकीय भूमिका लिनुपर्ने अवस्था आएको बताए ।

“सबै दललाई कुनै न कुनै ढंगले सहमति र सहकार्यमा ल्याएर राष्ट्रिय एकता कायम गर्दै एकाधिकार, दलाल पुँजीवादी प्रभुत्वलाई सदाका लागि विस्थापित गर्नुपर्ने बेला आएको छ । त्यो वातावरण बन्दै छ,” उनले भने । रासस