काठमाडौं । नेकपा (एकीकृत समाजवादी)का सम्मानित नेता झलनाथ खनालले ‘भ्रष्टाचारको नायक’लाई नेपाल नागरिक उड्डयन प्राधिकरण (क्यान)को महानिर्देशक बनाइएको बताएका छन् । शनिबार (चैत ९) काठमाडौंमा आयोजित एक कार्यक्रममा उनले आफ्नो पार्टी सरकारमा रहेका बेला क्यानको महानिर्देशकमा ‘भ्रष्टाचारको नायक’लाई नियुक्त गरिएको बताएका हुन् ।

उनले महानिर्देशकले कस्तो काम गरेको छ भन्ने छानबिन गर्नुपर्नेमा जोड दिए । भ्रष्ट व्यक्तिलाई क्यानको महानिर्देशक पदमा नियुक्त गर्ने सिफारिसकर्ताको अनुहार पनि अब बाहिर आउने उनको भनाइ थियो ।

शुक्रबार (चैत ८) सार्वजनिक लेखा समितिको बैठकमा तत्कालीन पर्यटनमन्त्री प्रेम आलेले झलनाथ खनालको दबाबमा आफूले क्यानको महानिर्देशक नियुक्त गरेको आरोप लगाएका थिए । सम्मानीत नेता खनालले आफूले पार्टी सदस्यता लिएपछि देशमा कुनै गलत काम नगरेको जिकिर गरे ।

• झलनाथको दबाबमा क्यान र निगम अध्यक्ष नियुक्त गरेँ : प्रेम आले

कम्युनिस्ट हुँ भन्ने र कमिसनमा मुख गाड्ने विषय सुहाउँदो नभएको उनले टिप्पणी गरे । महानिर्देशक नियुक्त गर्दा सिनियर र योग्यको ख्याल नगरी तत्कालीन मन्त्री र प्रधानमन्त्रीको हितमा काम गर्नेलाई रोजिएको उनले बताए ।

उनले पार्टीको महाधिवेशन भएको लामो समय भइसक्दा पनि ‘नेपाली विशेषताको समाजवादी कार्यक्रम’ प्रकाशन नगरिएको भन्दै आपत्ति जनाए ।

उनले नेताहरूले गरेको कमजोरीका कारण प्रतिगमनकारी सक्रिय भएको धारणा राखे । यस्तै अवस्था रहे ज्ञानेन्द्र शाह आएर नारायणहिटीमा बस्दैनन् भन्ने ग्यारेन्टी नरहेको उनको भनाइ थियो ।

उनले प्रतिगमनलाई रोक्न देशलाई आमूल परिवर्तन गर्ने कार्यक्रम र पहलकदमी आवश्यक रहेको बताए । हिमालयन टेली भ्वाइस