पोखरा । पृथ्वीनारायण क्याम्पस (पीएन)मा बुधबार मतदान नभएपछि बिहीबारको लागि तय भएको स्ववियु निर्वाचन अनिश्चित बन्न पुग्यो । मतपत्रमा त्रुटि भेटिएपछि बुधबार निर्वाचन समितिले नयाँ मतपत्र छपाइ गर्न थाल्यो । मतपत्र छपाइमा ढिला भएपछि बिहीबार बिहान ८ बजेदेखि मतदान सुरु हुने जानकारी विद्यार्थीहरूलाई गराइयो ।

बुधबारलाई मतदानको सूचना निकालेको निर्वाचन कमिटीले बेलुका भने मतदान अनिश्चित बनेको सूचना जारी गर्‍यो । किनभने, मंगलबार साँझ नै संयुक्त विद्यार्थी प्यानलसहित अखिल छैटौँले गेटमा तालाबन्दी गरे । निर्वाचनमा आचारसंहिता उल्लंघन भएका कारण तालाबन्दी गरिएको र नयाँ मिति तय हुनुपर्ने तथा आचारसंहिता पनि कडा गरिनुपर्ने माग उसले राख्यो ।

बुधबार मतदान नभएता पनि विद्यार्थी संगठन र निर्वाचन कमिटीबीच छलफल भयो । छलफलले अब १० गते मतदान गर्ने नयाँ मिति तय गरेको छ ।

बुधबार सर्वपक्षीय बैठकबाट १० गते निर्वाचन हुने मिति तय भएको निर्वाचन कमिटीले जारी गरेको सूचनामा भनिएको छ । १६ वर्षअघि सम्म विद्यार्थी संगठनले विभिन्न बहानामा निर्वाचन भाँड्ने काम गर्दै निर्वाचन स्थगित गराउँदा यसपटक भने विद्यार्थीहरू निर्वाचनको पक्षमा देखिए । यतिसम्म की उनीहरू अराजक गतिविधि नभइ एजेन्डा र विचारको आधारमा निर्वाचनमा होम्मिए ।

विद्यार्थीले निर्वाचन चाहे पनि मतदानका दिन मतपत्रमा प्रत्यक्ष तर्फको दोस्रो कोलममा रहेको अखिल (छैठौँ)को अध्यक्ष पदको उमेदवारको नामको पछाडि रेजा लगाउने कोठा नै छुटेपछि मतदान प्रक्रिया नै रोकिएको थियो ।

पीएनमा ६ संगठन र दुई स्वतन्त्र उमेदवार छन् । कमल सुवेदी र विप्लवी न्यौपानेले स्वतन्त्र उमेदवारी दिए भने, अखिल छैटौँबाट मिलन सुनार, प्राज्ञिक विद्यार्थी परिषद् नेपालबाट दिप्सन गुरुङ, अखिल क्रान्तिकारीबाट नविन अधिकारी, नेविसंघबाट सुशिल न्यौपानेको नेतृत्वमा उमेदवारी दर्ता भएको हो । अनेरास्ववियुबाट विष्णु पोखरेलले उमेदवारी दिए । अनेरास्ववियू, अखिल (क्रान्तिकारी) वैद्य, अखिल (क्रान्तिकारी) बहुमत र अखिल (समाजवादी)ले संयुक्त उमेदवारी दिएको हो । अखिल (समाजवादी) विप्लव समर्थित नेकपाको भातृ संगठन हो । संयुक्त मोर्चाबाट अनेरास्ववियूका सन्तोष पौडलले सभापतिमा मनोनयन दर्ता गरेका छन् ।

स्ववियु निर्वाचन समिति, क्याम्पस प्रशासन र निर्वाचनमा भाग लिएका विभिन्न संघ संगठन, प्यानल र स्वतन्त्र उमेदवारबीच भएको सर्वपक्षीय बैठकले रोकिएको निर्वाचन तुरुन्त गराउने निर्णय भएको निर्वाचन अधिकृत प्रा.डा. रामचन्द्र पोखरेलले जानकारी दिए । निर्वाचनको मौन अवधि आज राति १२ बजेदेखि लागु हुनेछ । यसअघिकै निर्वाचनका लागि कार्य क्षेत्रको जिम्मेवारी दिएका प्राध्यापक र कर्मचारीहरू यथास्थितिमा नै जिम्मेवारीमा रहने समेत निर्णय भएको पोखरेलले जानकारी दिए ।