पोखरा । पोखराको पश्चिमाञ्चल इन्जिनियरिङ क्याम्पस (डब्लूआरसी)मा दलगत विद्यार्थी संगठनका उमेदवारलाई हराउँदै स्वतन्त्र उमेदवार प्रकाश धामीले स्वतन्त्र विद्यार्थी युनियन (स्ववियु) सभापतिमा बाजी मारेका छन् ।

तनावका बीचमा बाक्लो सुरक्षाकर्मी परिचालन गरेर मंगलबार मतदान भएको थियो ।

क्याम्पसमा बुधबार मतदान गर्ने भनिएता पनि नेपाल विद्यार्थी संघले असहमति जनाउँदै अनशन र धर्ना गरिरहेको थियो ।

क्याम्पसको मुख्य द्वारमा तालाबन्दी गरेर विद्यार्थीलाई भित्र पस्नबाट वञ्चित गरिरहेपछि प्रहरी रोहबरमा पछाडिको गेटबाट विद्यार्थीहरूलाई मतदानको लागि पठाइएको थियो । यहाँ नेविसंघको तर्फबाट सचिवको उमेदवार थिएनन् । क्याम्पस प्रशासनले आफ्ना उमेदवारको मनोनयन नै नगरेको भन्दै नेविसंघले आपत्ति जनाउँदै आएको थियो । त्यसकै विरोधमा अनशन, धर्ना र टायर बाल्नेसम्मका गतिविधि भए ।

विरोधका बाबजुद भएको चुनावमा धामीले ७१६ मत ल्याएर अध्यक्षमा जिते । उनलाई विप्लव नेतृत्वको नेकपाको अखिल समाजवादीले समर्थन गरेको थियो ।

उनले एमालेनिकट अनेरास्ववियुका अनुप न्यौपाने, नेविसंघका सौगात पण्डित र अखिल क्रान्तिकारीका आदर्श महत क्षेत्रीलाई पराजित गरेका हुन् । न्यौपानेले ४४९, पण्डितले ३४६ र क्षेत्रीले १७८ मत प्राप्त गरे ।

सचिवमा अखिल क्रान्तिकारीका हरिकृष्ण खड्का ९२१ मत ल्याएर विजयी भए । खड्काले अनेरास्ववियुका विनायक भुवाजीलाई पराजित गरेका हुन् । भुवाजीले ७०४ मत ल्याए । कोषाध्यक्षमा भएको त्रिपक्षीय प्रतिस्पर्धामा पनि अखिल क्रान्तिकारीकै शसिस सापकोटा विजयी भए । उनले ६९९ मत ल्याउँदा अनेरास्ववियुका रोहितकुमार साहले ५८७ र नेविसंघका रस्मिता कुमारी झाले ३६६ मत ल्याइन् । सदस्यहरूमा भने अनेरास्ववियुका चार, नेविसंघका एक र क्रान्तिकारीका एक सदस्य निर्वाचित भएको निर्वाचन अधिकृत ई. दीपक थापाले जानकारी दिए ।