काठमाडौं । चलचित्र ‘भूठान’को मुख्य भूमिकामा हरिवंश आचार्य छन् ।

अंग्रेजीमा ‘द वर्ल्डस् ह्यापिएस्ट म्यान’ नाम दिइएको चलचित्रमा हरिवंशसँगै दयाहाङ राई, अनुराधा मजुमदार, पूजा चन्द लामा, रिचा घिमिरे, जोएस पाण्डे, अदिती प्याकुरेल, टम क्रेन, विमल सुवेदी, बु्रस डर्नलगायत कलाकारको अभिनय छ ।

मोसन पोस्टरसँगै टिजर र एउटा गीत रिलिज गरिएको यो चलचित्र निर्माणको सुरुआती चरणमा अरू नै कलाकार थिए । सुरुमा यो चलचित्रको निर्माणपक्षले बलिउडका प्रख्यात अभिनेताद्वय नसीरूद्दीन शाह र अनुपम खेरलाई खेलाउने तयारी गरेको थियो । नसीरूद्दीन र अनुपमलाई निर्माणपक्षले स्क्रिप्ट पढ्न पनि दिएको थियो ।

निर्माणपक्षको दाबीमा विश्वास गर्ने हो भने उनीहरूले स्क्रिप्ट मन पराएका पनि थिए । “पछि मन हुँदाहुँदै पनि नसीरूद्दीन शाहले प्राविधिक कारणवश काम गर्न नसक्ने अवस्था आयो भन्नुभयो,” ‘भूठान’का निर्माता अविरल थापा भन्छन्, “त्यसपछि हामीले अनुपम खेर र आदिल हुसेनलाई पनि प्रस्ताव गरेका थियौँ । तर, बीचमा खेरसँग चलचित्रको सिर्जनात्मक प्रस्तुतिमा पुगेर कुरा अड्कियो ।”

नाटक निर्देशक विमल सुवेदी र सहनिर्माता शैलेश मैनाली मुम्बई पुगेर अनुपम खेरलाई सुरुआती सहमतिपत्रमा हस्ताक्षर पनि गराएर फर्किएका थिए ।

सिर्जनात्मक पक्षमा कुरा नमिलेको र हस्तक्षेपकारी व्यवहार बढेपछि निर्देशक विनोद पौडेलले चलचित्रको सुन्दरतालाई बिग्रन दिनुभन्दा नेपाली कलाकारसँगै काम गर्न उचित लागेर खेरसँगको अध्याय बन्द गरिदिएका थिए । 

• ‘भूठान’बाट प्रस्ताव आउँदा दयाहाङले भनेका थिए– अंग्रेजी बोल्नुपर्छ भने खेल्दिनँ 

आदिल हुसेनसँग पनि विभिन्न कारणले काम हुन नसकेको थापा बताउँछन् । बलिउड अभिनेतासँग विभिन्न कारणले काम गर्न सम्भव नभएपछि अन्ततः उनीहरूलाई प्रस्ताव गरेको भूमिकामा हरिवंशको प्रवेश भएको थियो ।

हरिवंश ‘भूठान’मा भुटानबाट नेपाल हुँदै अमेरिका पुगेका भुटानी शरणार्थीको भूमिकामा छन्, जो उमेरका हिसाबले जीवनको उत्तरार्धमा छन् । कम्तीमा एकपटक आफू जन्मिएको र हुर्किएको भूमि भुटान पुग्न चाहने चरित्रमा यो पात्र रहेको शुक्रबार साँझ सार्वजनिक गीतले संकेत गरेको छ ।

‘भूठान’ हलिउडको साग अफट्राअन्तर्गत रहेर बनाइएको पहिलो नेपाली चलचित्र हो । यो चलचित्रमा हलिउडका केही प्राविधिकले पनि काम गरेका छन् ।

भुटानदेखि भारत र नेपाल हुँदै अमेरिकामा बसोबास गरिरहेका भुटानीको देशप्रेम र आफ्नो थातथलो छोड्नुपर्दा घर हराएको कथा ‘भूठान’को मुख्य कथानक रहेको बताइएको छ । यसलाई गीतले पनि संकेत गरेको छ । 

‘बुलबुल’ फेम्ड निर्देशक विनोद पौडेल निर्देशित ‘भूठान’का निर्मातामा अविरल थापा, सुशांक मैनाली, राजेन्द्र ठकुराठी, अमिताभ जोशी र किर्तना बाँस्कोटा छन् । 

‘भूठान’ चलचित्र आउँदो वैशाख १२ गते प्रदर्शनमा आउँदै छ ।