काठमाडौं । संघीय मामिला तथा सामान्य प्रशासन मन्त्रालयले काठमाडौं महानगरपालिकामा नयाँ प्रमुख प्रशासकीय अधिकृत तत्काल नपठाउने भएको छ । सामान्य प्रशासनमन्त्री राजकुमार गुप्ता व्यक्तिगत कारणले पोखरा गएको हुँदा प्रमुख प्रशासकीय अधिकृत तत्काल नपठाइने र निमित्तलाई आर्थिक अधिकार पनि नदिइने भएको हो ।

बिहीबार (फागुन २२) मन्त्रालयले महानगरका प्रमुख प्रशासकीय अधिकृत सरोज गुरागाईंलाई नै निरन्तरता दिन पत्र पठाएको थियो । तर, गुरागाईंलाई हाजिर गराउन नसकिने भन्दै महानगरका मेयर बालेन्द्र शाह (बालेन)ले मन्त्रालयलाई ‘काउन्टर’ जवाफ फर्काएका थिए ।

महानगरले काठमाडौं टावर १२ तले बनाउन स्वीकृति दिएको थियो । तर, त्यो १९ तलाको बनाउन सम्झौतापत्रमा हस्ताक्षर गरेको आरोपमा गुरागाईंलाई मेयर बालेनले अघोषित निलम्बन गरे ।

गएको पुस ८ देखि १७ गतेसम्म बिदामा रहेका गुरागाईंको कार्यकक्षमा बालेनको सचिवालयले ताला लगाएको थियो । गुरागाईं बिदामा गएका बेला निमित्त कार्यकारीको जिम्मेवारी शिक्षा विभागका प्रमुख गोविन्दप्रसाद शर्मालाई दिइएको थियो । तर, उक्त जिम्मेवारी सम्हाल्नुभन्दा शर्मा राजीनामा दिँदै बाहिरिए ।

महानगर करिब दुई महिनादेखि प्रमुख प्रशासकीय अधिकृतविहीन छ । मन्त्रालयका प्रवक्ता कालीप्रसाद पराजुलीले महानगरले पठाएको पत्र आफूहरूसमक्ष आइपुगेको जानकारी दिए । उनले उक्त पत्रमाथि कुनै छलफल नभएको बताए ।

“महानगरको पत्र पायौँ । अब अर्को पठाउने वा आर्थिक अधिकार दिने भन्नेबारे छलफल भएको छैन । मन्त्रीज्यू व्यक्तिगत कारणले पोखरा जानुभएको छ,” पराजुलीले बाह्रखरीसित भने, “मन्त्रीस्तरीय छलफल गरी निर्णय लिनुपर्ने भएकाले तत्काल केही गर्न सकिँदैन । मन्त्रीज्यू फर्किएपछि मात्रै छलफल हुन्छ ।”

गुरागाईंमाथि छानबिन गर्न पुस १६ गते महानगरका कानुनी सल्लाहकार शेखरप्रसाद पौडेलको संयोजकत्वमा समिति गठन गरिएको थियो । १५ दिनभित्र ठोस सुझाव सिफारिस गर्न भनिएको थियो । तर, पौडेलले कानुनी सल्लाहकारबाटै राजीनामा दिएका थिए ।

त्यसपछि फेरि नेपाल सरकारका पूर्वसचिव एवं मेयर बालेनका सल्लाहकार शंकर पाण्डेको संयोजकत्वमा अर्को समिति गठन गरिएको थियो । उक्त समितिलाई एक महिनाको समयावधि तोकिएको थियो । एक महिनाको म्याद सकिएपछि पुनः १० दिन थप गरिएको थियो । त्यो समय पनि सकिएपछि मेयर बालेनले फेरि अवधि थपेनन् ।

गुरागाईंमाथिको छानबिन समिति बिनानिष्कर्ष खारेज हुँदा प्रमुख कार्यकारी अधिकृतको मुद्दा गिजोलिएको छ । गुरागाईंलाई मेयर बालेनले स्वीकार नगर्दा महानगर समस्यामा परेको छ ।