काठमाडौं । नेपाल पर्यटन बोर्डले जर्मनीको बर्लिनमा सुरु भएको आईटीबी बर्लिन–२०२५ मा नेपाल पभेलियन स्थापना गरेको छ । संस्कृति, पर्यटन तथा नागरिक उड्डयनमन्त्री बद्री पाण्डेले मंगलबार नेपाल पभेलियनको उद्घाटन गरेका छन् । 

नेपाललाई विश्वभरका पर्यटकहरूको आकर्षणको केन्द्र बनाउन नेपाल पर्यटन बोर्डले २८ प्रतिष्ठित पर्यटन व्यवसायीलाई यस मञ्चमा सहभागी गराएको छ । जसमा साहसिक पर्यटन, सांस्कृतिक अन्वेषण, पदयात्रा तथा ‘प्रिमियम’ आतिथ्य सेवा समावेश छन् । 

मन्त्री पाण्डेले उद्घाटन समारोहमा नेपालका अद्वितीय पर्यटकीय सम्भावनाको चर्चा गर्दै नेपालको पर्यटनलाई अन्तर्राष्ट्रिय स्तरमा प्रचार र प्रवर्द्धन गर्ने प्रतिबद्धता व्यक्त गरे । 

समारोहमा जर्मनीका लागि नेपाली राजदूत डा. शैल रुपाखेती र नेपाल पर्यटन बोर्डका प्रमुख कार्यकारी अधिकृत दीपकराज जोशीलगायत नेपाल र विभिन्न देशका पर्यटन व्यवसायीको उपस्थिति थियो।

नेपाल पभेलियनमा नेपालको अद्वितीय प्राकृतिक सौन्दर्य, साहसिक पर्यटन, सांस्कृतिक धरोहर र अन्य प्रमुख पर्यटन गन्तव्य प्रस्तुत गरिनेछन् । आईटीबी बर्लिन–२०२५ लाई नेपालको दिगो पर्यटन प्रतिबद्धता र प्रबर्द्धनका लागि उपयुक्त अवसरका रूपमा प्रयोग गर्नुपर्ने मन्त्री पाण्डेले बताए । 

आईटीबी बर्लिनजस्तो प्रमुख अन्तर्राष्ट्रिय मञ्‍चमा नेपाली कम्पनीहरूको सहभागिताले नेपालका पर्यटकीय आकर्षणलाई प्रवर्द्धन गर्ने एउटा सुनौलो अवसर हुने विश्‍वास बोर्डका सीईओ जोशीले व्यक्त गरे । 

यो कार्यक्रम नेपालका विविध पर्यटन क्षेत्रहरूलाई प्रवर्द्धन गर्नका साथै, अन्तर्राष्ट्रिय पर्यटन उद्योगसँग साझेदारी गर्ने र नयाँ बजारमा नेपालको पहिचानलाई थप सशक्त बनाउन सहयोगी हुने अपेक्षा गरिएको छ । 

यसले नेपालको पर्यटन व्यवसायलाई अन्तर्राष्ट्रिय बजारमा नयाँ सम्भावनाहरूको खोजी गर्ने र नेपाललाई विश्वभरका पर्यटकसमक्ष प्राथमिक गन्तव्यको रूपमा प्रस्तुत गर्ने बोर्डको अपेक्षा छ । 

सन् १९९६ बाट सुरु भएको आईटीबी बर्लिन विश्वको प्रमुख यात्रा व्यापार मेला हो र यस वर्ष १८० भन्दा बढी देशबाट १० हजारभन्दा बढी पर्यटन व्यवसायीको सहभागिता रहनेछ । 

नेपालले यस मञ्चलाई आफ्नो हिमालमा ट्रेकिङ, सांस्कृतिक अन्वेषण र साहसिक पर्यटनका विशेष अनुभवलाई विश्वभर चिनाउनको लागि निरन्तर सक्रिय रूपमा प्रयोग गर्दै आएको छ ।