१.
जिन्दगी भ्वाङ परेको पुलझैँ भयो
जिन्दगी फाटेको झुलझैँ भयो
सोचेजस्तै कहाँ भयो र जीवन
जिन्दगी ओइलाएको फूलझैँ भयो

२.
गुण नभएका नाम मात्रका गुनीको के काम
अर्थहीन बनेको यो जुनीको के काम    
यहाँ यस्तै भइरहेको छ बुझ्दै छु म 
कमसल जोगीले जगाएको धुनीको के काम

३.
लामखुट्टे नछेक्ने झुलको जालीको काम छैन
दर्शकबिनाको दीर्घाको तालीको काम छैन
यहाँ बलेको आगो ताप्नेको मात्र स्थान छ
हलोको खिइँदै गएको फालीको काम छैन

४.
जिन्दगी समुद्रबिनाको छाल भइदियो    
जिन्दगी पानीबिनाको ताल भइदियो
अभावै अभावले घेरिएको यो जुनी
जिन्दगी संगीतबिनाको ताल भइदियो