विराटनगर । कोसी प्रदेशको ऐतिहासिक महत्त्व र समकालीन आवश्यकता सम्बोधन गर्दै, कोसी विचार उत्सवको तयारी पूरा भएको छ । 

वीणा फाउन्डेसनको आयोजनामा विराटनगरमा फागुन १५ देखि १७ सम्म उत्सव हुन लागेको हो । आयोजकले बुधबार आयोजना गरेको पत्रकार सम्मेलनमा फाउन्डेसनका संस्थापक बरुण झाले क्षेत्रीय, राष्ट्रिय र वैश्विक महत्त्वका मुद्दाहरूमा खुला संवाद र सहकार्य प्रवर्द्धन गर्न उत्सवको आयोजना गरिएको बताए । यसमा केन्द्रीय र प्रदेश स्तरीय राजनीतिक नेतृत्व तथा विज्ञको प्रस्तुति र सहभागिता रहने बताए ।

कांग्रेस नेता डा. शेखर कोइराला, कोसीका मुख्यमन्त्री हिक्मत कार्की, प्रतिनिधिसभाका सांसद प्रदीप ज्ञवाली, योगेश भट्टराई, सांसद मनीष झा, सुनिता बराल, शिशिर खनाल, निशा डांगी, भगवती चौधरी, ज्ञानेन्द्र शाहीलगायत सहभागी हुँदैछन् । 

प्यानल छलफलमा नेपालका चर्चित पत्रकारहरूले सहजीकरण गर्ने बताइएको छ । टीकाराम यात्री, ऋषि धमला, जीवराम भण्डारीलगायत विषयगत विज्ञले छलफललाई सहजीकरण गर्नेछन् ।

झाले भने ,"नीति, संस्कृति, व्यवसाय व्यवस्थापन, शिक्षा, स्वास्थ्य, र वातावरणजस्ता विषयमा केन्द्रित मञ्चले विचारहरूको आदान–प्रदान र सामूहिक समाधानलाई प्राथमिकता दिनेछ ।"  कोसी प्रदेशमा आयोजित विचार उत्सवको पत्रकार सम्मेलनमा विभिन्न क्षेत्रका विद्वान्, बुद्धिजीवी र कलाकारहरूले सांस्कृतिक र सामाजिक विकासका लागि महत्त्वपूर्ण छलफल हुने उनले सुनाए ।‌ 

विचार उत्सवले क्षेत्रीय संवादको दिगो मञ्चको स्थापना गर्दै सामाजिक, सांस्कृतिक, र आर्थिक विकासमा योगदान पुर्‍याउने लक्ष्य लिइएको छ । प्राकृतिक र सांस्कृतिक सम्पदाले समृद्ध कोसी प्रदेशले उत्सवका लागि विशिष्ट पृष्ठभूमि प्रदान गर्ने संस्थापक झाको भनाइ छ । स्थानीय हिमालय रोडमा खुलासत्रका रूपमा गरिने उत्सवमा नेपालका चर्चित कलाकारको दैनिक सांस्कृतिक तथा सांगीतिक प्रस्तुति समेत रहने छ ।