
काठमाडौं । स्वास्थ्य तथा जनसंख्या मन्त्रालयले मेला महोत्सवमा आफ्नो प्रचार गर्ने सुर्तीजन्य पदार्थ उत्पादकलाई कारबाही गर्ने भएको छ । यस्तो कार्य गर्नेलाई सुर्तीजन्य पदार्थ नियन्त्रण तथा नियमन ऐन २०६८ अनुसार कारबाही गरिने मन्त्रालयले विज्ञप्तिमार्फत् जनाएको छ ।
“केही मेला महोत्सव, जात्राका नाममा सुर्तीजन्य पदार्थको उत्पादकको संलग्न भएकोप्रति मन्त्रालयको गम्भीर ध्यानाकर्षण भएको छ, कानुन विपरीतका कार्य गर्नेलाई कारबाही हुने जानकारी गराइन्छ,” विज्ञप्तिमा भनिएको छ ।
सुर्तीजन्य पदार्थ नियन्त्रण तथा निषेध ऐन २०६८ को दफा १० अनुसार उत्पादकलगायत कसैले पनि सार्वजनिक रूपमा प्रचार गर्न पाइँदैन । पत्रपत्रिका, रेडियो, टीभी, इन्टरनेट, इमेल जस्ता विद्युतीय सञ्चारमाध्यम, अन्तर्क्रिया, कार्यक्रममा यो ऐन लागु हुन्छ ।
त्यस्ता प्लेटफर्ममा होर्डिङ बोर्ड, भित्ते लेखन, लोगो, संकेत, चिन्ह्वा कुनै पनि माध्यमबाट सुर्तीजन्य पदार्थको विज्ञापन वा प्रवर्द्धन गर्न वा कार्यक्रम, समाचार वा सूचना सम्प्रेषण गर्न नपाइने ऐनमा उल्लेख छ ।
साथै, सुर्तीजन्य पदार्थको प्याकेजिङमा पछिल्लोपटक जारी भएको निर्देशिकाअनुसार गर्न उत्पादकलाई मन्त्रालयले अनुरोध गरेको छ । नेपालमा सुर्तीजन्य पदार्थको प्रयोगबाट हुने रोगहरूका कारण वार्षिक ३७ हजार बढी नागरिकको मृत्यु भइरहेको छ ।