‘हामीलाई मद्दत गर्नुहोस्’ दुई युवती पानामा सहरको लक्जरी डेकापोलिस होटेलको झ्यालमा कागजको टुक्रामा यो सन्देश लिएर उभिरहेका छन्।

यस होटेलमा दुई विशेष रेस्टुरेन्ट, एक स्विमिङ पुल र एक स्पा छ। निजी यातायात सुविधा पनि उपलब्ध छ। यो होटेलले आफ्ना ग्राहकहरूलाई समुद्र देखिने कोठाहरू उपलब्ध गराउँछ। 

तर अहिले यो होटललाई अस्थायी ‘हिरासत केन्द्र’मा परिणत गरिएको छ । अमेरिकाबाट फिर्ता पठाइएका २९९ आप्रवासीलाई यहाँ राखिएको छ । पनामा सरकारले मंगलबार यो जानकारी दिएको हो ।

यहाँ राखिएका केही आप्रवासीले आफ्नो हात उठाउँछन् र आफ्नो स्वतन्त्रता खोसिएको संकेत गर्न विशेष चिह्न बनाउँछन्। कतिपयले ‘हामी हाम्रो देशमा सुरक्षित छैनौँ’ भन्ने संकेत दिन चाहन्छन् ।

अमेरिकी राष्ट्रपतिको चुनावी अभियानका क्रममा नै डोनाल्ड ट्रम्पले वैध कागजातविना अमेरिकामा बसोवास गर्ने मानिसहरूलाई देश निकाला गर्ने ठूलो कार्यक्रम सञ्चालन गर्ने बताएका थिए र ह्वाइट हाउसमा आएलगत्तै उनले सो काम सुरु गरेका थिए ।

ट्रम्पको यो नीतिअन्तर्गत अमेरिकाबाट पठाइएका यस्ता व्यक्ति गत हप्ता तीनवटा विमानमा पनामा पुगेका थिए । पानामानियाका राष्ट्रपति जोसे राउल मुलिनोले भर्खरै आफ्नो देश अमेरिकाबाट पठाइएका आप्रवासीहरूका लागि ‘सेतुको देश’ बन्ने सहमति जनाएका थिए । 

तर, भारत, चीन, उज्वेकिस्तान, इरान, भियतनाम, टर्की, नेपाल, पाकिस्तान, अफगानिस्तान र श्रीलंकाका २९९ आप्रवासीमध्ये १७१ मात्रै आफ्नो देश फर्कन तयार छन् । बाँकी १२८ जना आफ्नै देश फर्किंदा झनै असुरक्षित हुने त्रासमा छन् ।