काठमाडौं । नेपाल र नेपाली विद्यार्थीको आत्मसम्मानमा चोट पुग्ने गरी अभिव्यक्ति दिने भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयका दुई अधिकारीले माफी मागेका छन् ।

नेपाली छात्राको मृत्युपछि आन्दोलित नेपाली विद्यार्थीलाई उनीहरूले फेब्रुअरी १६ को राति दुर्व्यवहार गरेका थिए । उनीहरूले नेपालको बजेटभन्दा आफ्नो विश्वविद्यालयको बजेट ठूलो भएको जनाउँदै नेपाली विद्यार्थीलाई तत्काल आफ्नो देश फर्किन धम्की दिएका थिए ।

“मैले फेब्रुअरी १६ को दिन जे अभिव्यक्ति दिएँ, त्यो केआईआईटीको आधिकारिक धारणा होइन । मेरो अभिव्यक्तिले नेपाली विद्यार्थी र नेपाली जनतामा आघात पुगेकोमा म त्यसप्रति माफी माग्छु,” नेपाली विद्यार्थीलाई धम्की दिने केआईआईटीका दुई अधिकारीमध्ये एक मञ्जुशा पाण्डेले भनेकी छिन् । 

नेपाली विद्यार्थीमाथि दुर्व्यवहार गर्ने अर्की अधिकारी जयन्ती नाथले पनि आफ्नो उद्देश्य नेपाली विद्यार्थी र नेपाललाई आघात पुर्‍याउने नरहेको बताएकी छिन् । 

“नेपाललाई लिएर मैले दिएको अभिव्यक्तिप्रति म माफी माग्न चाहन्छु । मेरो उद्देश्य कसैलाई चोट पुर्‍याउने थिएन । मेरो भनाइले विश्वविद्यालयको प्रतिनिधित्व गर्दैन,” जयन्ती नाथले भनेकी छिन् । 

दुवैजनाले नेपाल र नेपाली विद्यार्थीसँग माफी मागेको भिडियो सामाजिक सञ्जालमा राखेका छन् । 

फेब्रुअरी १६ मा २० वर्षीया नेपाली छात्रा प्रकृति लम्साल केआईआईटीको गर्ल्स होस्टलमा मृत अवस्थामा फेलापरेकी थिइन् । त्यसपछि त्यहाँ रहेका नेपाली विद्यार्थीले लम्साललाई आत्महत्या गर्न बाध्य पार्नेहरूमाथि कारबाहीको माग गर्दै आन्दोलन गरेका थिए । 

विश्वविद्यालयका ती दुई अधिकारीले आन्दोलन गरिरहेका विद्यार्थीमाथि दुर्व्यवहार गरेका थिए । 

केआईआईटी विश्वविद्यालयका उपकुलपति प्रा. शरनजीत सिंहले पनि मंगलबार नेपाली विद्यार्थीहरूसँग माफी माग्दै उनीहरूलाई क्याम्पसमा फर्किन अपिल गरेका छन् । एक क्षमायाचना पत्र जारी गर्दै उनले माफी मागेका हुन् ।