काठमाडौं । मण्डला थिएटरमा नाटक ‘उम्लिँदो खरानी र लेम्लेम्मा’ मञ्चन हुने भएको छ । मण्डला थिएटरले घोषणा गरेको सात निर्देशकमध्येको पाँचौँ नाटक ‘उम्लिँदो खरानी र लेम्लेम्मा’को मञ्चन यही फागुन ९ गते शुक्रबारबाट हुनेछ । 

‘उम्लिँदो खरानी र लेम्लेम्मा’लाई पशुपति राईले निर्देशन गर्नेछिन् । यो नाटकलाई मण्डला थिएटरको तर्फबाट रङ्गकर्मी–कलाकार विजय बरालले निर्माण गरेका छन् । 

लोक कथा र मिथकबाट प्रभावित भएर मिल्सन राईले लेखेको यस नाटकले माझ किरातको मुन्दुम र श्रुति परम्पराबाट आएको कथालाई बोकेको छ । जसले मातृसत्तात्मक समाजमा पितृसत्तात्मक व्यवहार कसरी सुस्तरी प्रवेश गर्‍यो र यसले व्यवहारगत रूपमा कसरी आफ्नो विचार हावी गरायो भन्ने कथा भन्नेछ । 

निर्देशक राई स्वयंले परिकल्पना गर्दै रंगगमञ्चमा लोक र आधुनिक शैलीको मिश्रणका साथ नाटक प्रस्तुत हुँदै छ । 

नाटकमा ठिल्ने ल्हमो, प्रयास वान्तवा राई, रिन्छेन कुन्छोक मोक्तान, रोशनी स्याङ्बो, प्रायदीप राई, दिग्गज खत्री, युवाहाङ राई, बलबहादुर राई र रमिला मोक्तानको अभिनय रहेको छ । यसलाई रोशनी स्याङ्बोले सह–निर्देशन गरेकी छिन् । 

नाटक चैत ३ गतेसम्म सोमबारबाहेक हरेक दिन साँझ ५ः३० बजे र शनिबार दिउँसो १ बजे मण्डला नाटकघर थापागाउँमा नियमित मञ्चन हुनेछ ।