काठमाडौं । सत्तापक्षीय दलका प्रमुख सचेतकहरूको बैठकले सरकारले ल्याएको ६ वटा अध्यादेश अझै १० दिन अघि नबढाउने विषयमा छलफल गरेका छन् । 

आइतबार सिंहदरबारमा भएको बैठकपछि नेपाली कांग्रेसका प्रमुख सचेतक श्याम घिमिरेले अध्यादेश संसद्मा निर्णयार्थ पेस गर्न अझै १० दिन लाग्नसक्ने बताए । 

शनिबार बसेको सत्ता गठन्धनको बैठकले फागुन ६ गतेको बैठकमा भूमिबाहेकका पाँच अध्यादेश अघि बढाउने निर्णय गरेको थियो । “अध्यादेश ६ गते पेस गर्ने सरकारको तर्फबाट जानकारी आएको हो । सांसद बाहिर जानुभएको छ । दश दिनको समय चाहिन्छ,” उनले भने, “अहिले कुम्भ मेला चलिरहेको छ । धेरै सांसद जिल्ला जानुभएको छ । उहाँहरूलाई जम्मा गर्न समय चाहिन्छ भनेका छौँ ।” 

नेकपा (एमाले)का मुख्य सचेतक महेश बर्तौलाले ६ वटै अध्यादेश एकैपटक अघि बढाउने तयारी भएको बताए । भूमिसम्बन्धी अध्यादेशमा उठेका प्रश्नहरूबारे गृहकार्य गरेपछि एकैपटक अघि बढ्ने उनले संकेत गरे । 

“६ वटै अध्यादेश एकैपटक प्रस्तुत गर्ने पक्षमा छौँ । संसद्मा अध्यादेश निर्णायक ढंगले प्रस्तुत हुँदा पारित हुन्छ । अध्यादेशमा बढी भएका कुरा प्रतिस्थापन विधेयकमा घटाउँछौँ,” बर्तौलाले भने । 

उनले विगतका चारवटा अधिवेशनमा पास भएका भन्दा बढी विधेयक यस अधिवेशनबाट पारित गर्नेगरी अघि बढ्नुपर्नेमा सत्तापक्षका प्रमुख सचेतकहरूले जोड दिएको बताए । 

“सदनमा कतिपय विचाराधीन विधेयकलाई अगाडि बढाउने विषयमा छलफल भयो । सदनमा पेस भएका अध्यादेशका सन्दर्भमा पनि केही छलफल भए । आगामी कुन बैठकमा यसलाई कार्यसूचीमा लैजान सकिन्छ ? त्यो विषयमा पनि छलफल गरेका छौँ,” उनले भने, “अधिवेशनबाट हामीले चारवटा विधेयकमा पारित गरेको भन्दा बढी संख्यामा विधेयक पारित गर्नेगरी काम गर्नुपर्छ भन्ने निष्कर्ष छ ।” 

उनले शिक्षा र संघीय निजामति विधेयकलाई पहिलो प्राथमिकतामा राखेको जानकारी दिए ।