site stats
बाह्रखरी :: Baahrakhari
कला
Global Ime bankGlobal Ime bank
४७ वर्षअघिको ‘विषयवस्तु’ लाई लिएर मह जोडीको आलोचना 

काठमाडौंं । अमेरिकी सांसदले नेपालमा नास्तिकता फैलाउन पाँच लाख डलर खर्च गरेको बताएपछि त्यसको तरंग नेपालमा पनि आइपुग्यो । 

अमेरिकी संसद्को फरेन अफेयर्स (विदेश मामिला) समितिका सभापति तथा फ्लोरिडाबाट रिपब्लिकन पार्टीका सांसद ब्रायन मास्टले नेपालमा ‘नास्तिकता’ फैलाउन पाँच लाख अमेरिकी डलर खर्च गरिएको केही दिनअगाडि बताएका थिए । 
 
अमेरिकी राष्ट्रपति डोनाल्ड ट्रम्पले अमेरिकी अन्तर्राष्ट्रिय विकास नियोग (यूएसएआईडी)का गतिविधि रोक्नुका सम्बन्धमा सीबीएसकी पत्रकार मार्गरेट ब्रेननको ‘फेस द नेसन’ कार्यक्रममा मास्टले ‘नास्तिकता’ फैलाउन नेपालसहित कुन देशमा कति खर्च गरिएको थियो भनेर सार्वजनिक गरेका थिए ।   

उक्त समाचार आएपछि सामाजिक सञ्जालमा कुन संस्थाले यूएसएआईडीमार्फत कति पैसा लिए भनेर विभिन्न व्यक्तिले सार्वजनिक गरिरहेका छन् । यूएसएआईडीमार्फत पैसा लिने संस्थाहरूको सूचीमा हरिवंश आचार्य र मदनकृष्ण श्रेष्ठको संस्था मह संचार पनि छ । 

मह सञ्चारले टेलिसिरयल बनाउन यूएसएआईडीमार्फत पैसा लिएर हिन्दु धर्मविरोधी गतिविधि गरेको आरोप हरिवंश र मदनकृष्णलाई लागिरहेको छ । विशेषगरी मदिरा सेवन गरेर ब्राह्मणले श्राद्ध गरेको र क्रिश्चियन धर्मको प्रचार गरेको भन्ने मह जोडीमाथि आरोप लागिरहेको छ । 

मह सञ्चारले भने आरोपको खण्डन गरेको छ । आफूहरू कुनै पनि धर्म विरोधी नरहेको कलाकार हरिवंश आचार्य बताउँछन् । नियोजित रूपमा कोही व्यक्ति विशेष र समूह दुष्प्रचारमा लागिरहेको उनको भनाइ छ । 

“नेपालमा गणतन्त्र आयो । गणतन्त्र नै यिनीहरूले ल्याएका हुन् भन्ने केही व्यक्तिलाई लागिरहेको छ । गणतन्त्र ल्याउने हाम्रो हैसियत थिएन । हामीले ल्याएको पनि होइन,” हरिवंश भन्छन्, “पछि कसोकसो गणतन्त्र आयो । हाम्रो काम नै हास्यव्यंग्य हो । हामीले पञ्चायतकालमा पनि तत्कालीन व्यवस्थाविरुद्ध व्यंग्य गरेका हौँ ।” 

मह जोडीको व्यंग्यकै कारण गणतन्त्र आयो भन्ने भ्रम रहेकाले केही व्यक्तिले त्यसको रिस अहिले पोखिरहेको हरिवंशको निष्कर्ष छ । आफूहरूलाई मन नपराउने व्यक्तिले नियोजित रूपमा भ्रम फैलाइरहेको उनी बताउँछन् । 

यूएसएआईडीको सहयोग लिनु नै गलत हो भन्नु नै सही तर्क नभएको उनको भनाइ छ । राम्रो कामका लागि पारदर्शी तरिकाले वैधानिक संस्थाबाट सहयोग लिनु गलत नहुने उनी बताउँछन् । 

“यूएसएआईडीको सहयोगमा पोलियो थोपा खुवाउन, खोप दिने कार्यक्रम नेपालमा सरकारले नै सञ्चालन गरेको छ । यसलाई हेर्ने हो भने यूएसएआईडीको पैसा शरीरभित्र नपसेको कोही मान्छे नै छैन होला,” उनी अगाडि थप्छन्, “जसले हामीलाई गलत हो भनेर कमेन्ट गरिरहनु भएको छ, ऊ स्वयं र उसको छोराछोरी, बाआमा, दिदीबहिनीको शरीरभित्र यूएसएआईडीको पैसामा आएको खोप छ । पोलियो थोपा छ ।” 

यूएसएआईडीले ‘टेन्डर’ आह्वान गरेको र प्रतिस्पर्धामा आफूहरूले पाएको रकमबाट टेलिचलचित्र बनाएको उनी प्रष्ट पार्छन् । महसञ्चारले टेलिचलचित्र ‘मदनबहादुर हरिबहादुर’ द्वन्द्व समाधानलाई लिएर ५२ भाग निर्माण गरेको थियो । यसका लागि तीन करोडको ‘टेन्डर’ उनीहरूलाई परेको थियो । 

“हामीले पोलियो थोपा, रुवेला र अरू केही पीएसए पनि बनाएका थियौँ । तपाईंहरूले बनाउँदा प्रभावकारी हुन्छ भनेर हामीले बनाएका हौँ,” हरिवंश भन्छन्, “टेन्डरमा परेको पैसाबाट ३७ घण्टाको टेलिसिरयल बनाएका हौँ । यसलाई गलत चित्रण गर्ने काम भइरहेको छ । विस्तारै यो सबै प्रष्ट हुन्छ ।” 

धर्मको कुरा किन निस्कियो भन्ने नै आफूले बुझ्न नसकेको उनको भनाइ छ । ‘सराध्य’ भन्ने टेलिसिरयल आफूले २०३४ साल प्रज्ञा भवनमा भएको गाईजात्रा महोत्सवमा पहिलोपटक देखाएको प्रहसन भएको हरिवंश सुनाउँछन् । 

“यो प्रहसन हेर्न राजा वीरेन्द्रलगायत सबै हेर्न आउनु भएको थियो । यो प्रहसनबाट मैले गोल्डमेडल पनि पाएको थिएँ,” उनी स्मरण गर्छन्, “त्यसलाई परिमार्जन गरेर पछि हामीले पञ्चायतका सराध्य भनेर देखाएका थियौँ । यसकै केही क्लिप्स काटेर धर्मसँग जोडेर भ्रम फैलाउने काम अहिले भइरहेको छ । यो एक दिन आफैँ प्रष्ट हुनेछ ।” 

उनले अहिले सामाजिक सञ्जालमा भाइरल भइरहेको क्लिप्स ०५४ सालमा बनाइएको बताए । 

उनले उक्त विषयवस्तु पहिलोपल्ट ०३४ सालमा देखाइएको भए पछि पञ्चायत ढलेको सातवर्षपछि पुनः त्यही विषयवस्तुमा आधारित रहेर छायांकन गरिएको बताए । नियत खराब राखेर नगरिएको व्यंग्यलाई गलत तरिकारले प्रचार गर्न नहुनेमा उनको जोड छ । 

तर, त्यसैलाई अहिले गलत तरिकाले व्याख्या गर्न केही व्यक्ति र समूह नै लागिपरेको उनको गुनासो छ । महजोडीलाई नराम्रै बनाउँछु भनेर अभियान चलिरहेको उनको बुझाइ छ । 

तत्कालीन राजालाई पनि गणतन्त्र कसरी आयो भन्ने जानकारी रहेको भन्दै हरिवंश भन्छन्, “सायद उहाँलाई पनि हामीसँग गुनासो छैन होला । हामीले ल्याएर गणतन्त्र आएको भन्दा पनि कसरी नेपालमा गणतन्त्र आयो राजालाई प्रष्ट थाहा छ ।” 

तत्कालीन राजाप्रति बढी सेवाभाव देखाउने व्यक्तिहरूले महसञ्चारविरुद्ध अभियान चलाएको हुनसक्ने उनको भनाइ छ । महसञ्चारले गलत काम नगरेकोमा आफू ढुक्क रहेको हरिवंश सुनाउँछन् । 

“यस्तो समयमा हामी यस्तो व्यक्ति अथवा संस्था हो भनेर हरेक नेपाली नागरिकलाई भन्दै हिँड्ने कुरा पनि भएन । यो जनताले आफैँ मूल्यांकन गर्ने कुरा हो,” हरिवंश अगाडि थप्छन्, “यूएसएआईडीको पैसा भनेर हेर्दा पर्वत नै खाएजस्तो गरेर अभियान चल्यो । वास्तविकता एकदिन आफैँ प्रष्ट हुन्छ ।” 

यूएसएआईडीको प्रायोजनमा तयार भएका भिडियो सामग्री कस्ता छन्, त्यो आफैँ बोल्ने उनको भनाइ छ ।  “द्वन्द्व समाधान गरौँ, शान्ति प्रक्रियामा जाऔँ, खोप लगाऔँ, पोलियो थोपा बच्चालाई खुवाऔँ भन्ने सन्देश दिने सामग्री बनाउँदा कसरी धर्मको पक्ष र विपक्षमा भयो ?” उनको प्रश्न छ । 

समयले नै धेरै कुरा प्रष्ट पार्ने र जनता आफैँ मूल्यांकन गर्न सक्षम रहेकाले गलत अभियान चाँडै विफल हुनेमा हरिवंश ढुक्क छन् ।  नयाँ वर्षको अवसरमा ‘अफर’मा राखिएको क्रिश्चियनको तस्बिर राखेर गलत व्याख्या भइरहेको भन्दै त्यसलाई रोक्न उनको आग्रह छ । 

“नयाँ वर्ष अथवा कुनै चाडपर्वको अवसरमा अहिले पनि सन्दर्भअनुसार सुपरमार्केट, पसलमा राखिन्छ,” उनी अगाडि भन्छन्, “त्यसलाई गलत ब्याख्या गर्ने काम भइरहेको छ जुन, आफैँमा गलत हो ।” 

प्रकाशित मिति: शुक्रबार, फागुन २, २०८१  ०९:१८
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro