काठमाडौं । लेखक तथा पत्रकार राजेश खनालको ‘चिकित्साका १४ तारा’ पुस्तकबारे सुनकोशी वाङ्मय प्रतिष्ठानले विमर्श गरेको छ । बिहीबार काठमाडौंमा एक कार्यक्रम गर्दै चिकित्सक तथा साहित्यकारहरूले पुस्तकमाथि चर्चा गरेका हुन् । 

प्रतिष्ठानले पहिलो कार्यक्रममै चिकित्सा क्षेत्रको कृतिमाथि विमर्श गरेको हो । पुस्तकमा नेपालको चिकित्सा सेवा क्षेत्रमा अग्रसर १४ जना अग्रज डाक्टरहरूको भूमिका, संघर्ष र तत्कालीन अभ्यासबारे चर्चा गरिएको छ ।

चिकित्सा, साहित्य र राजनीति हिजो पनि सँगसँगै थियो र अहिले पनि कसरी एक–अर्कालाई प्रभावित पार्दै अघि बढेको छ भन्ने तथ्य पुस्तकले छर्लंग देखाएको वरिष्ठ मनोचिकित्सक तथा मानसिक अस्पताल पाटनका निर्देशक डा. अनन्त अधिकारीले बताए । 

पुस्तकमा समेटिएका तथ्य तथा घटना अहिलेको पुस्ताका निम्ति प्रेरणा बन्नसक्ने उनको बुझाइ छ । यस्तै, वरिष्ठ स्त्रीरोग विशेषज्ञ डा. सुमनराज ताम्राकार पुस्तक चिकित्सा क्षेत्रमा पाइला अघि बढाउँदै गरेका जनशक्तिमात्र नभई स्वास्थ्य क्षेत्रसँग सरोकार राख्ने सबैका निम्ति ऐना भएको बताए ।
 
चिकित्सा पेसा आफैँमा डंकी र रिस्की पेसा भएको तथ्य पुस्तकले देखाएको डा. ताम्राकारको बुझाइ छ । “यो राम्रो सुरुवात भएको छ, चिकित्सा सेवाका सबै अग्रजहरूको जीवनी तथा मृत्युपश्चात् अविच्युरीमार्फत उनीहरूको योगदान झल्काउनुपर्छ, यस्ता पुस्तक सबैले पढ्नुपर्छ” उनी भन्छन् ।
 
चिकित्साका १४ तारा अग्रजहरूको सम्मानमा लेखिएको ऐतिहासिक पुस्तक भएको निबन्धकार तथा नेपाल स्रष्टा समाजका अध्यक्ष श्रीओम श्रेष्ठ रोदनले बताए । उनले यो पुस्तक निबन्ध कृति नै भएको बताउँदै भने, “यो पुस्तक नेपालको स्वास्थ्य क्षेत्रका लागि इतिहास हो । अग्रज डाक्टरहरूप्रतिको सम्मान र हरेक पाठकका निम्ति उत्प्रेरणा पनि हो ।” 

प्रतिष्ठानका अध्यक्ष कवि छविरमण सिलवालले संस्थाको उद्देश्यमाथि प्रकाश पार्दै आगामी दिनमा विविध साहित्यिक क्रियाकलाप गर्दै जाने बताए । 

पुस्तक रत्न पुस्तक भण्डारले प्रकाशनमा ल्याएको हो ।