काठमाडौं । राष्ट्रिय स्वतन्त्र पार्टी (रास्वपा)का सांसद शिशिर खनालले गृहमन्त्री रमेश लेखकलाई कुन नैतिकताले कुर्सीमा बस्ने ? भन्दै प्रश्न गरेका छन् । मंगलबार प्रतिनिधिसभा बैठकको आकस्मिक समयमा उनले डिउटीका प्रहरीमाथि कुटपिट गर्ने अनेरास्ववियु नेताका विषयमा अनुसन्धान नगरिएको भन्दै प्रश्न गरेका हुन् ।

“डिउटीमा रहेका प्रहरीलाई कुट्ने अस्कल क्याम्पस पढ्ने अनेरास्ववियुका नेतालाई नेपाल प्रहरीले अनुसन्धान गर्ने हिम्मत पनि गरेको रहेन छ,” विद्यार्थीले आफूलाई पठाएको मेसेज सुनाउँदै उनले भने, “कक्षाकोठामा सधैँ उहाँहरूको दादागिरी चल्थ्यो । तर, अब पुलिसले पनि आँट नगरेपछि कसरी पढ्ने होला र ? कृपया यसबारे बोलदिनु न भनेर मेसेज आएको छ ।”

सत्ता जोगाउन अनेरास्ववियुका नेतामाथि अनुसन्धान नगरिएको आरोप पनि उनले लगाए । उनले दुईतिहाइको सरकारका गृहमन्त्रीले प्रहरीकै सुरक्षा गर्न नसके युवा कसको मुख हेरेर देशमा बस्ने ? भन्दै थप प्रश्न गरे ।

“कम्तीमा पनि छातीमा हात राखेर आज नेताहरूले भन्नुपर्छ, दुईतिहाइको तपाईंहरूको बहुमत छ, गृहमन्त्रीले आफैँले कमान्ड गरेको प्रहरीको सुरक्षा दिन सक्दैन भने नेपाली युवा कसको अनुहार हेरेर यो देशमा बसिदिनुपर्ने ? तपाईंहरूलाई भोटै हाल्न ?,” खनालले भने ।

उनले उक्त घटनाबारे गृहमन्त्रीको जवाफ पनि माग गरे । “आफ्नो कमान्डमा रहेको प्रहरीलाई सुरक्षा दिन नसक्ने गृहमन्त्रीले कुन नैतिकताले आफ्नो कुर्सीमा बस्ने हो ? हामीलाई जवाफ दिनुपर्‍यो,” सांसद खनालको माग छ ।