रौतहट । पूर्वपश्चिम महेन्द्र राजमार्गअन्तर्गत रौतहट र सर्लाही जिल्लाका बीचमा रहेको वाग्मती नदीमाथिको पुल मर्मत थालिएको छ । डिभिजन सडक कार्यालय चन्द्रनिगाहपुरले डेढ किलोमिटर ड्राइभर्सन बनाएर पुल मर्मत थालेको हो ।

केही दिनअगाडि पुलको बिम (गिर्डर) चर्किएको थियो । पुलको पूर्वतर्फ ४ र ५ नम्बरको स्परमाथि जडान गरिएको बिम झन्डै आठ सेन्टिमिटर चर्किएको कार्यालयका प्रमुख अरुणकुमार कर्णले जानकारी दिए । यही माघ २६ गते डाइभर्सन बनाएर २८ देखि पुल मर्मतको काम थालिएको उनले बताए ।

करिब ५५ वर्षअघि नेपाल–सोभियत संघ सहयोगअन्तर्गत निर्मित वाग्मती नदी पुलको ४ र ५ नम्बर स्परको बीचमा रहेका बिममा रहेको बेरिङ राख्ने ‘प्याडेस्टल’ कंक्रिट फुटेको उनले जानकारी दिए । पुलमा आधुनिक प्रविधिबाट उच्च गुणस्तरको कंक्रिट हालेर ढलान गरिने काम भइरहेको प्रमुख कर्णले बताए ।

यही बेला अरू बिमको पनि सरसफाइ तथा बेरिङ र कंक्रिटको अवस्था हेरिनेछ । आउँदो फागुन २ गतेभित्र पुल सञ्चालनमा ल्याउने गरी काम भइरहेको उनले जानकारी दिए । चौबिसै घण्टा व्यस्त रहने पुलको यथाशीघ्र मर्मत गरेर त्यहाँबाट सवारी सञ्चालन गराउने लक्ष्य लिइएको उनले बताए ।

बिम चर्किएर समस्या आएपछि पुल महाशाखाको टोली आएर स्थलगत निरीक्षण गरेर दिएको सुझावका आधारमा मर्मत सुरु गरिएको उनको भनाइ छ ।

माघ २५ मा सडक डिभिजन कार्यालयले पत्राचार नै गरेर २७ गतेदेखि सवारी आवागमनमा रोक लगाइएको थियो । पुलको बिम चर्किएपछि सवारी आवागमन थप जोखिमपूर्ण बनेको थियो । रासस