काठमाडौं । नेपाल समाजवादी पार्टी (नयाँ शक्ति)का अध्यक्ष डा. बाबुराम भट्टराईले जातीय र क्षेत्रीय दल कालान्तरमा बिलाउने विश्लेषण गरेका छन् । नेसपा (नयाँ शक्ति)को प्रथम महाधिवेशनमा प्रस्तुत राजनीतिक प्रतिवेदनमा उनले बहुजातीय र बहुभाषिक पहिचान भएको नेपालजस्तो राष्ट्रमा जातीय र क्षेत्रीय राजनीतिले समस्याको समाधान दिन नसक्ने उल्लेख गरेका छन् ।

“बहुजातीय बहुभाषिक र क्षेत्रीय विविधतायुक्त नेपालमा भर्खरै राज्यको संघीय ढाँचामा पुनर्संरचना भएकाले विभिन्न नाउँमा जातीय/क्षेत्रीय पहिचानवादी पार्टीहरू जन्मने र बिलाउने भइरहेका छन्,” डा. भट्टराईले भनेका छन्, “ खासगरी मधेसी, आदिवासी जनजाति र थारु बाहुल्य क्षेत्रहरूमा त्यो प्रवृत्ति देखिएको छ । नेपालजस्तो अल्पविकसित र जटिल भूराजनीतिक अवस्था भएको देशमा जातीय/क्षेत्रीय समस्यालाई समावेशी चरित्रको देशव्यापी राष्ट्रिय शक्तिले मात्र हल गर्न सक्छ ।”

त्यस्ता पार्टी केही समय प्रभावमा रहे पनि अन्ततः अस्तित्व समाप्त हुने उनले टिप्पणी गरेका छन् । “अतः कालान्तरमा जातीय/क्षेत्रीय दलहरू एकाकार हुने वा बिलाउँदै जाने अनुमान गर्न सकिन्छ,” डा. भट्टराईले भनेका छन् ।