काठमाडौं । नेपाल समाजवादी पार्टी (नयाँ शक्ति)का अध्यक्ष डा. बाबुराम भट्टराईले नेपाली कांग्रेसलाई ‘उदारवादी धारको नेता पार्टी’ भनेका छन् । नेसपा (नयाँ शक्ति)को प्रथम महाधिवेशनमा भट्टराईले प्रस्तुत गरेको राजनीतिक प्रतिवेदनमा देशभर कांग्रेसको आधार रहेको उल्लेख छ ।

“व्यक्तिको निजी स्वतन्त्रतालाई प्रधानता दिने र पुँजीवादी खुला बजार अर्थतन्त्रको पैरवी गर्ने उदारवादी लोकतान्त्रिक धारको मुख्य प्रतिनिधि नेपाली कांग्रेस हो,” डा. भट्टराईले प्रतिवेदनमा भनेका छन्, “प्रजातान्त्रिक समाजवादको कुरा गरेर २००७ सालदेखिको लोकतान्त्रिक आन्दोलनसँग जोडिएको र विभिन्न राजनीतिक प्रवृत्तिका व्यक्ति र समुदायहरू पनि जोडिँदै आएकाले यसको देशभर उल्लेख्य आधार छ ।”

यस्तो जनाधार समेत भएको पार्टीले राजनीतिक र वैचारिक ढंगले नयाँपन दिन नसकेको उनको टिप्पणी छ । “परन्तु, यसले बीपी कोइरालाको समययता वैचारिक, राजनीतिक, कार्यक्रमिक ढंगले खासै प्रगति र नयाँपन प्रदर्शन गर्न सकेको छैन,” उनले भनेका छन्, “पटक–पटक सत्ताको नेतृत्व गर्दा पनि देशका राजनीतिक, आर्थिक, प्रशासनिक, सामाजिक, सांस्कृतिक क्षेत्रमा गुणात्मक रूपान्तरण गर्न सकेको छैन ।”

कांग्रेसका नेताहरू भ्रष्टाचार र अनियमिततासँग जोडिने गरेको भन्दै उनले यसले देशको अर्थ–राजनीतिक समाधान दिन नसक्ने जिकिर गरेका छन् । “देशका गम्भीर प्रकृतिका अर्थ–राजनीतिक समस्या र नयाँ युगको नयाँ कार्यभार यो ऐतिहासिक रूपले पुरानो भइसकेको राजनीतिक धार र शक्तिबाट पूरा हुन असम्भव छ,” डा. भट्टराईको प्रतिवेदनमा उल्लेख छ ।