पोखरा । यही हप्ता गोर्खा सैनिकमा भर्ती भएका नेपाली युवालाई ब्याच वितरण गर्न बेलायती राजकुमार एडवार्ड र राजकुमारी सोफी शुक्रबार पोखरा आइपुगे । बेलायतबाट हुने राजकीय भ्रमणमा पोखरा प्राय छुट्दैन ।

बेलायती राजकुमारको पोखरा भ्रमणको चर्चा हुँदैगर्दा पोखरामै नेपालका पूर्वराजा ज्ञानेन्द्र शाह पनि आउने भए । वर्तमान राजपरिवारका एडवार्ड र अन्तिम राजा ज्ञानेन्द्र पोखरा एकैसमयमा आउनुमा कुनै सन्दर्भ त छैन । तर, संयोगले भने केही चर्चा पायो । बेलायती राजकुमार आएर निर्धारित कार्यतालिकाअनुसार नै फर्किइसके ।

नेपालका पूर्वराजा ज्ञानेन्द्र शाह भने आइतबार पोखरा झरेका छन् । अबका दुई हप्ता उनले पोखरा आसपासमा बिताउनेछन् ।

ज्ञानेन्द्रलाई पोखरामा राजावादी दलका अलावा नागरिक स्वागत मूल समारोह समिति एवम् पश्चिमाञ्चलवासी नेपाली जनताको नामबाट पोखरामा स्वागत गरियो । यसको संयोजकत्वमा प्रा. डा. जगमान गुरुङ थिए ।

राजालाई स्वागत गरिसकेपछि उनले सामाजिक सञ्जालमा कृतज्ञता ज्ञापन गरेका छन् ।

“आज २०८१ माघ २७ गते आइतबार श्री ५ महाराजाधिराज ज्ञानेन्द्र वीरविक्रम शाहदेव सरकार र शाही परिवारका अन्य सदस्यज्यूहरूको स्वागतका लागि पोखरा विमानस्थलमा स्वस्फूर्तरूपले सहभागी हुनुभएका समस्त महानुभावहरूमा हार्दिक कृतज्ञता ज्ञापन गर्दछु,” उनले लेखेका छन ।

पोखरा विमानस्थलमा ज्ञानेन्द्रले न्यानो माया पाए । उनका समर्थकहरूले पूरानै नारा, ‘हाम्रो राजा, हाम्रो देश, प्राणभन्दा प्यारो छ’, ‘राजा आउ, देश बचाउन’का नारा लगाउन छुटाएनन् ।

ज्ञानेन्द्रले भने कुनै अभिव्यक्ति दिएनन् । उनी किन पोखरा आएका हुन् भन्ने पनि अहिलेसम्म रहस्यमै छ । तर, उनको सचिवालय र उनलाई स्वागत गर्ने पश्चिमाञ्चलवासीका तर्फबाट संयुक्त कार्यतालिका तय गर्ने तयारी भइरहेको छ ।

सचिवालयका एक सदस्यका अनुसार ज्ञानेन्द्रले पोखरा र आसपासका जिल्लाका शक्तिपीठहरूको दर्शन गर्नेछन् । नागरिक अभिनन्दन लगायतका विषय भने अहिले नै तय भइसकेको छैन । रूपाकोट रिसोर्टमा उनको बसाइँ हुनेछ ।