काठमाडौं । नेकपा (एमाले)का सांसद पदम गिरीले नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'लाई सत्ताबाहिर हुँदा सामाजिक सञ्जाल विधेयक घाँडो भयो भन्दै प्रश्न गरेका छन् । आइतबार प्रतिनिधिसभा बैठकमा उनले माओवादीका तत्कालीन सञ्चारमन्त्री रेखा शर्माले नै विधेयक ल्याएको स्मरण गराए ।

यसअघि, माघ २४ गतेको संसद् बैठकमा प्रचण्डले विधेयकप्रति आपत्ति जनाएको छ ।

“पूर्वसञ्चारमन्त्रीले स्वयंले भन्नुभएको छ– सामाजिक सञ्जाल नियमन विधेयक मैले ड्राफ्ट गरेको हो । अहिलेको सञ्चारमन्त्रीले त अलिकति रंगरोहन गरेको हो । सबै मैले गरेको हो भनेर मिडियाका बीचमा बोलेको सुनेको हो । अहिले यही विधेयक घाँडो भयो ? सत्तामा रहँदा एउटा कुरा सत्ताबाट बाहिर जाँदा अर्को कुरा गर्ने ?,” उनको प्रश्न छ । 

उनले सरकारले ल्याएको अध्यादेशले देशवासी खुसी भएको दाबी गरे । उनले अध्यादेशको विरोध गरेर कसको सेवा गर्न खोजेको भन्दै प्रश्नसमेत गरे ।

गिरीले सामाजिक सञ्जालमा आएका काण्डहरूको विषय सबै छानबिन गर्ने हो भन्दै प्रश्न गरे । सामाजिक सञ्जालमा जनयुद्धको पैसा अमेरिकाको जुवा घरमा लगानी भएको छ भन्ने विषयमा छानबिन समिति बनाउने भन्दै प्रश्न गरे ।