काठमाडौं । ओखलढुंगा र प्युठानमा बलात्कारका दुई छुट्टाछुट्टै घटना अनुसन्धानका क्रममा प्रहरीले दुई आरोपितलाई पक्राउ गरेको छ ।

ओखलढुंगामा १६ वर्षीया एक किशोरीको बलात्कार आरोपमा सिद्धिचरण नगरपालिका–९ का ३८ वर्षीय राजकुमार भुजेललाई शनिबार (माघ २६) बिहान पक्राउ गरिएको प्रहरी प्रधान कार्यालयले जानकारी गराएको छ ।

गएको पुस १७ गते राति राजकुमारले ती किशोरीको बलात्कार गरेको भन्ने उजुरीका आधारमा प्रहरीले उनलाई पक्राउ गरेको हो ।

उता, प्युठानमा १३ वर्षीया एक बालिकाको बलात्कार आरोपमा प्रहरीले गौमुखी गाउँपालिका–५, खुङ सुन्दरमेलाका २२ वर्षीय कुलमान थापामगरलाई शनिबार साँझ पक्राउ गरेको छ ।

गएको बिहीबार (माघ २४) दिउँसो कुलमानले ती बालिकाको बलात्कार गरेको भन्ने उजुरीका आधारमा पक्राउ गरिएको प्रहरीले जनाएको छ ।