काठमाडौं । गोड स्पिन टेबलटेनिस क्लबका पूर्णशंकर श्रेष्ठले प्रथम पुष्पराज शाक्य स्मृति टेबलटेनिस प्रतियोगितामा शुक्रबार स्वर्ण जितेका छन् ।

खोल्चा पुखु खेलकुद समितिको आयोजनामा शंखमूलस्थित इलेभन स्टार क्लबमा भएको भेट्रान ६० वर्षमाथि पुरुष एकल फाइनलमा पूर्णशंकरले सेहोपीका राजन सुब्बालाई ११–६, १०–१२, ११–९, ५–११ र १२–१० को सेटमा पराजित गर्दै स्वर्ण जितेका हुन् । सीवाइसीका खेलाडीद्वय आनन्द धाक्वा र रोशन प्रधान संयुक्त रूपमा तृतीय भए ।

ललितपुर महानगरपालिका–११ को मुख्य प्रायोजना तथा स्पिन इभेन्ट प्रालिको व्यवस्थापनमा भइरहेको उक्त प्रतियोगितामा विभिन्न ६ स्पर्धामा १५० खेलाडी सहभागी छन् । प्रतियोगिताको कुल पुरस्कार राशि दुई लाख रहेको छ ।

पुरुष तथा महिला एकल खेलमा शीर्ष तीन स्थान हात पार्नेले क्रमशः ३० हजार, १५ हजार र सात हजार पाँच सय पुरस्कार प्राप्त गर्नेछन् । बाँकी चार स्पर्धामा पहिलो हुनेले १० हजार, दोस्रोले पाँच हजार र तस्रोले दुई हजार पाँच सय पुरस्कार पाउने छन् ।