काठमाडौं । नेपाली कांग्रेसकी सांसद प्रतिमा गौतमले काठमाडौंको लम्सीफेदीका आन्दोलनकारी र जनप्रतिनिधिसँग वार्तामार्फत निकास निकाल्न माग गरेकी छन् । शुक्रबार प्रतिनिधिसभा बैठकमा उनले  बस्तीबीचबाट लगिएको विद्युत् सबस्टेसनले जनताको उठीवास हुने बताइन् ।

“प्रशस्त विकल्पहरू हुँदाहुँदै पनि मानव बस्तीबीचबाट लगिएको सबस्टेसनले त्यहाँका जनता उठीवास हुने अवस्थामा पुगेका छन्,” उनले भनिन्, “राज्यले नै अन्याय गरेको महसुस त्यहाँका जनताहरू गर्न थालेका छन् । आज प्रशासन र नागरिकबीच भएको द्वन्द्वले त्यस क्षेत्र रणभूमिमा नै परिणत भइरहेको छ ।”

उनले जनताको भावनालाई बुझ्ने कोसिस नगरी बल प्रयोग गरी गरिने विकास कार्यले कसरी राहत दिन सक्छ ? भन्दै प्रश्न गरिन् । “विकासलाई जनता स्वयंले आत्मसात् गर्न पाउनुपर्छ । सरकारले जनताको आवाजलाई बेवास्ता गरी उम्कन हुँदैन,” उनले भनिन् ।