काठमाडौं । जनता समाजवादी पार्टी (जसपा) नेपालले सरकारले ल्याएको अध्यादेशबारे अध्ययन भइरहेको बताएको छ । बिहीबार एक विज्ञप्ति जारी गर्दै जसपा नेपालले अध्यादेशबारे थप अध्ययन र छलफल गरी संसदीय दलको अर्को बैठकमा देश र राष्ट्र हित हुने गरी ठोस निर्णय लिने जनाएको छ ।

"प्रतिनिधिसभा र राष्ट्रियसभामा अध्यादेशलाई पेस नगरी कार्यसूचीबाटै हटाएको अवस्थामा जसपा नेपालले अध्यादेशबारे कुनै औपचारिक निर्णय आजै नलिई उक्त प्रतिवेदन उपर थप अध्ययन र छलफल गरी संसदीय दलको अर्को बैठकमा देश र राष्ट्रहित हुने गरी ठोस निर्णय लिने जानकारी गराउन चाहन्छौँ," पार्टी अध्यक्ष उपेन्द्र यादवका स्वकीय सचिव महेश चौरासियाले जारी गरेको विज्ञप्तिमा भनिएको छ ।

अध्यादेशको सम्बन्धमा पार्टीलाई जोडेर विभिन्न सञ्चारमाध्यम र सामाजिक सञ्जालमा आएका समाचार तथा सूचना आधारहीन र तथ्यहीन भएको जसपाले स्पष्ट पारेको छ । साथै, भ्रमित नहुन पनि आग्रह गरेको छ ।

"अध्यादेशको सम्बन्धमा जसपा नेपाललाई जोडेर विभिन्न सञ्चारमाध्यम र सामाजिक सञ्जालमा अतिरञ्जित, मनगढन्ते र प्रायोजित ढंगले आइरहेका समाचार र सूचनाहरू आधारहीन, तथ्यहीन र भ्रामक रहेकोले त्यस्ता गलत र गैरजिम्मेवार सूचना र समाचारको पछि नलाग्न आमजनता, पार्टीपंक्ति र सञ्चारमाध्यमलाई हार्दिक अनुरोध गर्दछौँ," विज्ञप्तिमा भनिएको छ ।

जसपाले गठन गरेको अध्यादेश अध्ययन कार्यदलले बिहीबार दिउँसो सिंहदरबारस्थित संसदीय दलको कार्यालयमा पार्टी अध्यक्ष यादवलाई राय सुझावसहितको प्रतिवेदन बुझाएको छ । सांसदहरूलाई अध्ययनका लागि सो प्रतिवेदन समेत दिइएको छ ।

बिहीबार दिउँसो नै प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवासँग जसपा नेपालका अध्यक्ष यादवले भेट गरेका थिए । भेटमा दुई नेताले अध्यादेशमा सहयोग गर्न यादवलाई आग्रह गरेका थिए । उनले छलफलबाट निष्कर्ष निकालिने बताएका छन् ।