काठमाडौ । कवि कवीन्द्र सिटौलाले १० लाख कविहरूको कविता संकलन गरेर विश्वकै विशाल कवितासंग्रह ‘ग्रन्थ’ प्रकाशित गर्ने उद्घोष गरेका छन् । बितेको तीन दशक बढी समयदेखि अमेरिकामा रहेर काम गर्दै आएका सिटौलाले नेपालबाट सात लाख तथा अन्य सय देशबाट तीनदेखि चार लाख कविता संकलन गर्ने प्रेस विज्ञप्तिमा जनाइएको छ ।

बुधबार काठमाडौंमा आयोजित कार्यक्रममा कवि सिटौलाले आफू विश्व कविता यात्रा लिएर एक सयवटा मुलुक पुग्ने र कविता वाचनसँगै कविता संकलन गर्ने जानकारी दिए ।

सिटौलाले भने, "लेखकको परिचयसहित कविता लेख्न मिल्ने गरी कविता फाराम तयार गरिएको छ । कविताग्रन्थ दुई भाषा– नेपाली र अंग्रेजीमा हुनेछ ।"

सिटौलाका अनुसार यो अभियान नेपाल र नेपालीलाई पुस्तौँपुस्तासम्म चिनाउने गौरवमय आयोजनाका रूपमा संस्थागत गर्दै विकास गरिनेछ । उनले सम्भव भएसम्म कवि लेखककहाँ आफैँ पुगेर कविता लेखाउने र संकलन गर्ने बताए । तयार ग्रन्थ विश्वका सबैजसो ठूला पुस्तकालयमा राखिने पनि उनले बताए ।

कार्यक्रममा साहित्यकारहरू श्रीओम श्रेष्ठ रोदन, राधेश्याम लेकाली, अनेसास अध्यक्ष राजेन्द्र केसीले शुभकामना मन्तव्य दिए ।