काठमाडौं । निर्देशक तुलसी घिमिरेको निर्देशनमा तयार हुने चलचित्र ‘पहाड’को छायांकन सुरु भएको छ । गोर्खा दरबारमा मंगलबार पूजा गरेपछि मुहूर्त सट दिएसँगै चलचित्रको छायांकन सुरु भएको हो । 

अभिनेता मदनकृष्ण श्रेष्ठ, अरुण क्षेत्री र डेब्यु अभिनेत्री पञ्चमी घिमिरेले मुहूर्त सट दिएका थिए । 
 
युवा जनशक्ति विदेश पलायन हुँदा खाली भएका पहाड र यसले ल्याउने सामाजिक र आर्थिक समस्याको कथामा यो चलचित्र बन्न लागेको हो । 

चलचित्रको कथा पनि निर्देशक घिमिरेले नै लेखेका छन् । चलचित्रको छायांकन गोर्खा आसपासमा २५ दिन र भारतमा १५ दिन हुनेछ ।
 
चलचित्रमा विपीन कार्की, सुनील थापा, प्रियंका कार्की, रवीन्द्र सिंह बानियालगायत कलाकारले अभिनय गर्दैछन् ।